Trade licence leh GST pekna
phut lo turin MIMA-in ngen
Mizoram Merchant Association (MIMA) chuan Apex Bank hotute chu an hnen atanga loan laten AMC trade licence leh GST pekna hnuhnung ber an phut chu titawp turin an ngen.
MIMA hruaitute chuan Nilaini khan Mizoram Co-operative Apex Bank Ltd. chairman Lalnunsanga an hmu a. An bank atanga loan latute hnenah tunhnai hian Aizawl Municipal Corporation atanga an trade license leh Goods & Service Tax pekna hnuhnung ber document pe tura an phutna titawp tura an ngen chhan an hrilhfiah.
AMC licence-ah hian Mizo hnam himna a awm lo nia sawiin, AMC trade licence chhuah kum, kum 2012 atanga tun thlengin AMC Licencing Regulations chu him zo loa an la hriat reng thu an sawi.
‘AMC Licencing Regulations-in a phut – Voters ID leh Residential Certificate chu Mizoram tih a ni loa, India ram chhung khawi laiah pawh a hman theih avangin Mizoram Voter’s ID leh Permanent Residential Certificate of Mizoram hman ngei nise,’ an ti. 2years validity ILP an phut ngai loh chu phut turin an duh tih an sawi a. Dawr inkhar chhawn emaw engemaw dik lo a awm lohnan building neitu voter’s ID phut turin AMC hi an lo ngen tawh tih an sawi bawk.
GST Council of India-in kum khata cheng nuai 20 turnover nei lo tan GST register a ngai lo, tia a sawi angin, sumdawng tam tak in-register lo an awm a. Hengte avang hian Cooperative Apex Bank Ltd-in loan late hnena AMC trade licence leh GST pekna hnuhnung ber an phut chu titawp turin an ngen a ni.
Trade licence leh GST pekna phut lo turin MIMA-in ngen
