School Education department chuan zirtirtu an sawnte insawnkualna senso atan cheng nuai 166 chuang an hmang a. Transfer dil zirtirtu, he insenso dil ve thei lo chunga lo la te chu thinlet tum an ni.
Assembly Session-a zawhna School Education minister Dr Vanlalthlana chhan danin, kum 2024 hnulamah zirtirtu sawnkualte travel allowance atan Rs. 166, 21,568 an hmang tawh a. Hemi atana sum an sen tam chhan a sawi.
ZPM sawrkar tirhah a theih ang angin zirtirtu indaihlohnaah semrual an tum a, higher secondary level-ah zirtirtu 50 vela indaihloh ang an ni a; sawrkar hmasa in SEDP hmanga theih ang ang a lo hnawhkhah chu SEDP tawp hnu ah hnawhkhah zui dan an dap a, transition period-a an awm lai, school tan a hun tawh si avangin a awm ang ang insawnchhuah mai an rawt tih a sawi.
Zirtirtu senior tak tak, insawn chhuak loa kum 30 dawn Aizawl leh Lungleia la awm ngat ngat ang chi mi 50 vel chu hmun hla zawkah sawn darh an ni a; heng mite hi an school awm meknaa tangkai em em, an thiamna leh school tana an inhmanna ngaipawimawh tul tak an ni a; sawrkarin casual teacher a lo la thei hlauh bawk nen, sawnchhuah an nih hnu ah an awmna ngaiah dahlet leh an ni tih minister hian a sawi.
“Higher secondary zirtirtu rual, Group A officer rual sawn let lehnaah chuan sum sen a tam ta lo thei lo a ni,” a ti.
Heti chung hian, kum 2024-a sum an sen tam ang hi chu kum 2025-ah chuan a zia tawh tih a sawi a. High school-ah kum 2024-a cheng nuai 45 vel sennaah khan kum 2025 ah chuan nuai 12 velah a tla thla tawh niin a sawi.
Zirtirtu thenkhat anmahni thua transfer dil, transfer an dilnaa dah an nih hnuah, an hawk ve loh transfer TA a ruka lo dil, pek palh an nei tih an hriatchhuah thu Dr Vanlalthlana hian a sawi a. “Transfer dil, an dil anga sawnchhuah hnua transfer TA lo dil leh si an awm a nih chuan kan thing let ang,” a ti.
Kum 2024 hnulama transfer TA atana sen zat
Kum HSS HS MS PS Total
2024-25 1792690 4986180 3057760 3540280 13376910
2025-26 1581830 1213078 267120 182630 3244658
Total 3374520 6199258 3324820 3722910 16621568