Treasury Bazar
hluia inpho AMC-in insasang turin a ti
Treasurt Square bazar hlui, Aizawl Municipal Corporation-in mipui vantlang tana tangkai zawnga siam tuma a ruahman mekah August 13 vel atang khan mi thenkhat, thil zuara inpho an awm leh tan a. August 14 khan AMC chuan heng mite hi insasenga, an bungrua pawh senghawi turin a hriattir.
Aizawl Municipal Corporation (AMC) thuchhuak chuan, Mizoram Legislative Assembly ngheng maia awm bazar hi a him tawh lo nia ngaiin kumin March 17 khan a khar a. Mipui tana kalna leh chawlh hahdamna hmun nuam tak siam turin a ruahman a, project mumal tak siamin, hna thawh tanna tur work order a buaipui mek tih a sawi.
Treasury Bazar-a thu thin zawng zawng chu AMC Multi-Complex Tuikual South-ah thutna hmun pek an ni a, sawn thlak an nih hian duh leh mamawh hrang hrang an neih pawh AMC chuan a tihhlawhtlin sak thin a, cheng nuai 13 chuang a seng tawh tih a sawi a ni.
Hetih mek lai hian, tu tih hriat lohten Treasury Bazar hmun hluiah hian thutna hmun an sa a, thil zuar pawh an awm tih hriat a nih veleh a hmunah AMC-in a enfiah nghal a. Mi 8 velin thutna tur an siam a, pakhatin thil a lo zuar tawh a. Dan bawhchhiaa hma la te hian an hming an sawi duh loh avangin tunge an ni tih hriat theih a ni loa, AMC thuneituten rang taka insaseng nghal tura hriattirna (order) chhuahin, order-ah hian dan bawhchhiaa hma late chu August 14 chawhnu dar 3.00 hmaa insaseng a, an bungrua senghawi tura hriattir an ni tih a sawi.
‘AMC chuan Aizawla chengte hma ngaia hma a lakna kawng hrang hrangah mipuiin an thlawp tha hle in a hria a; lawmawm a ti takzet a. Hetih laia dan pawisa lo thenkhatin dan kalha hma an lo la hi AMC chuan a dem a, a tul angin hma a la zel dawn a ni,’ a ti.
Eitur thianghlim leh hrisel kan lei theihna tura Aizawl Municipal Corporation-in hma a lakna thlawp a, AMC Market Tuikual South-a thil zuarte lo dawr turin mipui a sawm tih a sawi bawk.
Treasury Bazar hluia inpho AMC-in insasang turin a ti
