Mizoram mipui sawrkar rorelna in sâng ber Mizoram Legislative Assembly House building nena inhne renga awm Treasury bazar chu tunkar Thawhtanni, March ni 17 khan a kang a. He bazara inzuar thinte chu, helai bazar thlang lawk, Tuikual South area-a ‘AMC Multi-Complex’ ah sawn an ni dawn ta a. Hei bakah hian, helai bulhnai, kawngpui kama Inrinnia chawhmeh zuara thu thinte pawh AMC Multi-Complex-ah hian sawn vek an ni dawn bawk a. AMC thuneitute nen an inbiak rem angin, vawiin Inrinni erawh a tawp nan kawngpui kama an inzawrhna thinah hian inzawrh an phalsak rih dawn a ni.
Tunhma kum 10 deuhthaw kalta atang khan, helai Treasury bazar hian ngaimawh a lo hlawh tawh a. A chhan pawh kan hriat angin, Mizorama hmun pawimawh ber tia chhal theih rorelna in sang ber Assembly House awmna a nih vang a ni. Tunhma pawh khan helai bazar-ah hian bomb te a lo puak tawh a, Assembly House building pawhin a tuar nghe nghe a nih kha. Hei bakah hian ruang te pawh chhar a lo ni tawh a, drug addict ho tawmkhawmna a ni bawk. Assembly House building himna (security measure) atanga thlir pawhin, helaia bazar a awm reng hi thil dik lo tak a ni hrim hrim a. Hei vang hian thuneitute pawhin bazar hi sawn tumin, tuna AMC Multi-Complex-a insuan lut tur hian helai bazara thute hi an lo nawr tawh thin a ni. Helai bazar sawn chhuah chungchang hi tunhma atanga hmalakna lo kal tawh reng a nih avangin hriat thiam loh tur thu a awm lo.
Inrinni apianga khawpui kawngpui dung tluan deuhthaw maia chawhmeh zuar kan intlar chiam mai pawh hi, changkanna, faina leh thianghlimna kawnga hmasawn zel tur kan nih dungthulin, heti luai luai lo deuha kalpui dan hi sawrkar hian a ruahman a pawimawh ta hle. Heng chawhmeh zuarte dinhmun hi tu te pawhin kan hriatthiampui vek ang; mahse, changkang zawk, fai leh thianghlim zawka ei kan zawn theih nan, he practice thlakna tur kan ngaihtuah hi a tul tawh khawp mai.
Khawpui a thang zel a, mipui kan pung, lirthei a pung, tunah chuan Assembly House awmna pawh hi a fuh ta chiah lo. Assembly House pawh hi duhthusamah chuan hmun fianrial deuh hlekah awm thei se a duhawm. Tuna sipai chhuahsan tur hmun hi thenkhat chuan an tinzawn deuh niin a lang a. Sipai chhuahsan tur ramah hian mipui pankhawm tur chi Laldenga Cultural Centre sak a ni dawn a. Helai hmun bawka Assembly House dah a nih chuan, mipui nena inchiahpiah lutuka hmun pawimawh tak a awm tur hi a rem teh teuh hmel lo hle a ni.
Treasury Bazar leh Assembly House
