Bawrhsap pisa atanga tribal certificate pek chhuah tinah a diltu awmna YMA branch hriatpuina tel ngeia pek an duh tih Sub Hqrs. YMA Saitual chuan an sawi.
Sub.Hqrs YMA Saitual hian Thawhlehni zan atang khan Saitualah rorel inkhawm an hmang a. District bawrhsap Dr Lalngura Tlau chuan a tanna hun hi hmanpuiin, inkhawmpui hian zanin, (May 2 zan) thleng a awh ang.
Rorel inkhawma thu pawm zinga sawrkar khawihah, tribal certificate pek chhuahnaah YMA hriatpuina tel ngeia pek chhuah a nih theih nana hma lak bakah District Education Office Saituala staff dah belh a nih theih nana hma lak, tih te a ni.
YMA khawihah hnamdang nupui pasal inneih pawlh a nih loh nana theihtawp chhuaha hma lak, nungcha humhalh kawngah leh air gun/ rifle khuahkhirh kawngah leh ramngaw humhalh kawnga nasa zawka hma lak, YMA-in tuihna humhalh a kalpui mekah chak zawka hma lak, kawng tha neih theih nana chak zawka hma lak, zu leh ruihhlo do kawngah YMA-in chak zawka hma lak, electoral roll dik leh felfai neih theih nan YMA-in hma lak chhunzawm zel, Zonun zemawi tlawmngaihna leh aia upa zah inzirtir, tih te chu pawm a ni bawk.
Tribal certificate pekchhuahah YMA hriatpuina tela pek an duh
