Tribal kan ngaipawimawh – Union MoS Aspirational district- Mamit district tlawh

Tribal kan ngaipawimawh – Union MoS
Aspirational district- Mamit district tlawh
Zan hnih riaka Mizoram rawn tlawhtu Union minister of state for Tribal Affairs Durgadas Uikey chuan Social Welfare and Tribal Affairs, Women & Child Development hotute a kawm bakah aspirational district Mamit a tlawh a, hnam hrang hrang aiawh a kawm.
Thawhlehni zana Social Welfare and Tribal Affairs, Women & Child Development minister Lalrinpuii leh department official-te a kawmnaah India ram chhung tribal-te tihhmasawn a ngaipawimawh tih sawiin, sawrkar laipui chuan India ram pumah leh a bikin hmarchhak state-a tribal hnam hrang hrang chengte hmasawnna atan tan a la ngawrh tih a sawi. Ram chhunga cheng zawng zawng tan hmasawnna rualkhai leh huamkim tak siam a pawimawh, tiin, tribal zingah pawh hnam hnufual zawkte chawikang tura Ministry of Tribal Affairs kaltlanga ruahmanna siam hrang hrang a sawi.
Mizoram tan pawh tun kum 5 chhunga Ekalavya Model School atan, Tribal Research Institute leh hmalakna dang hrang hrang atan sawrkar laipui atanga sum pekchhuah dan sawiin, Mizoramin chak taka hma la zel tura a duhsak thu leh, rang zawka sum pekchhuah belh zel dawn chuan chak zawka hman zawh a tul a, hna thawh chak a ngai tih a sawi a ni.
Tribal Affairs minister Lalrinpuii chuan department hmalakna hrang hrang a hrilh a. Sawrkar laipui atanga sum hmuh hmanga hnathawh leh thlen chin a sawifiah bakah harsatna leh mamawhna tawhte a sawifiah a. A bikin sawrkar laipuiin scholarship sum a rawn pekchhuah thuai theihnan hma laksak turin a ngen.
Nilaini khan Durgadas Uikey hian Mamit a tlawh a. Sawrkar department hotute leh hnam hrang hrang aiawhte kawmin hmunhma thenkhat a tlawh. Aspirational district – Mamit district chhunga hmalakna hrang hrang a taka hna thawh a nih leh nih loh enfiaha tlawh a ni tih Union minster of state hian a sawi a. Prime minister-in tlangrama chengte hmasawnna a ngaihpawimawh vangin hmasawnna tura scheme hrang hrang duan chu a hlawhtlin theihn’na a kaltlangna department official-ten ngaihtuahna tak tak sen a tul, tiin, scheme hlawhtlinna chu an kuta innghat a ni tih hre thar turin a chah. A bikin education leh health sector hnuaia hmalakna a pawimawh avangin a chhawrtu mipui chawikang ngei tura theihtawp chhuah a tul tih a sawi bawk.
Aspirational hnuaia line department hrang hrang hmalakna, hmachhawp leh harsatna awmte a ngaihthlak sak a ni.
Mamit district bawrhsap K Laltlawmlova chuan an district dinhmun a sawifiah a. Mamit district-ah hian mi 101290 an cheng a, a zau zawng square metre 3025 a ni. Chhungkua 20902 awmin literacy rate 84.93% a ni. Aspirational district hnuaia hmalaknaah tehfung hrang hranga tehnaah an district-in dinhmun tha tak tak a hauh tawh a, hei vang hian NITI Aayog atangin cheng vaibelchhe 19 dawn a ni. Ranking hnuhnung berah overall performance 5-na dinhmun a hauh mek.
Union MoS hian Mamit-ah an district chhunga hnam hrang hrang aiawhte a kawm a, an mamawh leh harsatna an thlen a ngaihthlak sak a. Common Service Centre Mamit Charkawn, Anganwadi Centre -I Mamit Bazar Veng leh Govt Mamit College tlawhin an dinhmun a enfiah bawk.