Sawrkar laipui Ministry of Tribal Affairs hnuaia Kelsih rama sak Tribal Research Institute chu Ningani khan Social Welfare, Tribal Affairs minister Er. Lalrinawma chuan a hawng.
Tribal Research Institute hi cheng nuai 2028.50 senna tura ruahman, March 2019 atanga sak tan a ni a. FK Construction sak niin nikum December khan sak zawh a ni. Zawlbuk, Exhibition Library leh Auditorium, Mizo lal in (Administrative building), Conference Hall-te a awm. Mi 50 ve ve lenna mipa leh hmeichhe dormitory awmin VIP cottage 4 a awm bawk. Workshop cum Training Centre a awm dawn a; la deh, hnang hlai, puan tah leh hnam thil inzirna hmunpui a ni dawn. Staff quarters unit awmin ruahtui khawlna zem, tui litre nuai 2 leng siam a ni. Synthetic thatch (artificial di) kangmei laka him, USA atanga chah hmangin a chung hi khuh a ni a, a chhuat leh a building bang hi mau dap ziarang ‘customised glaze tile’ leh ‘wall paper’ bel vek a ni.
TRI hi Mizo hnam ziarang – culture leh tradition vawnnun zel nan leh kan hnam chin dan hrang hrang, themthiamna inzirtirna hmunpui a ni dawn a, thiamhnang leh la deh zirbing duh tan mimal leh pawl anga zir theihna buatsaih a ni.
Minister chuan khawvel changkang zelah kan hnam nunphung leh ziarangte zawi zawiin thildangin a rawn thlak mek a. Research institute chu kan hnam chin dan, kan culture leh tradition vawnnun zel nan leh inzirna hmun ni turin a tangkai hle dawn tih a sawi. Kan hnam ziarang chu Pathianin keimahni mil tawk min pek a nih tih pawm a, zahpui lo turin a chah.
TRI hawnnaah hian Mizo lemziak, Mizoram Indigenous Association atangin infiamna bakah themthiamna hrang hrang entir a ni.
Tribal Research Institute hawng
