Mizoram tribe list chu siamtha turin PC chuan Home minister Lalchamliana kaltlangin sawrkarah ziakin an thlen.
PC party chuan Constitution (Scheduled Tribes) Order 1950 hnuaia Mizoram tribe list-ah Mizo hnam peng hrang hrang – Kuki, Hmar, Pawi, Paite, Lakher, Mizo (Lushai) te chuangin, tribe hrang hlak anga ngaih theih a ni chu Zofa hnam hrang hrang inunauna leh insuihkhawmna kawngah harsatna a thlen thei nia an hriat avangin, serial no.10 ‘Any Mizo (Lushai) tribes’ tih chu India dan hnuaiah Mizo leh Zofa hnamdang tribe hrang hlak anga kal thei a ni, tiin, ‘Any Lusei tribes’ tih emawa siamthat an duh bakah Zofa hnam lian list-a chuang lo, Ralte adt. pawh dah luh an duh tih an thlen.
Constitution (Scheduled Tribes) Order 1950 hnuaiah Kuki hnam tih loh Zofa hnamdang chi peng (sub-clan) tarlan loh chu chi peng hlawm lian chin, tribe ziah luh thar pawh huamin tarlan tha an tih thu leh, Mizorama India khua leh tui dik tak awmte pawh an chi peng tarlan nise tha an tih thu an thlen bawk.
‘The Mizoram Scheduled Tribes and Scheduled Castes (Regulation of Issuance and Verification of) Community Certificate Act 2014 hmangin sawrkar hnuaia zirna in hrang hranga hauh bik seat neih, sawrkar hnuaia scholarship, grant, allowance dawn, degree/diploma nei, cooperative society leh tualchhung sawrkar inthlana ding leh tling, tribe/caste list huam a/an nih ngei a ngaih laiin, tribe list kan hman mek siamthat a nih loh chuan he dan hi khawng taka lekkawh ni ta se khua leh tui dik tak ni si a huam tel loh tur tam tak a awm theih avangin hma lak thuai tha kan ti a,’ an ti.
MLA inthlanpuiah schedule tribe tan chauha chuh theih bial awm thin chu fet taka teh nise, tuna Mizoram tribe list ang hi chuan hnawl theih tam tak a awm thei a, inthlan fel zawk a awm theihna’n ngaipawimawh tul an tih thu an sawi
‘India khua leh tui dik tak, Mizorama awm nghet, Zofa ni lo hnamdangten an dikna chanvo an chan theihna’n an dinhmun zirchian nise kan ti a. Zofa insuihkhawm hian kan lung a len em em a, mah se, ‘Mizo’ tih hi kan mutan lian tak niin a lang. Mithiam leh hriaten sawifiah eng ang mah se, India dan hnuaiah Mizo leh Zofa hnamdangte hnam hrang anga ziah kan nih chhung chuan inunau leh insuihkhawm tak tak a thleng ngaiin kan ring lo,’ PC party hian an ti.
Mizoram tribe list siamthat bultan na’n Mizoram State Assembly-a pass ngei Committee din nise, chu chuan tribe list zirchiangin sawrkar laipuiah chak takin bawhzui se an duh tih Home minister hnenah hian an thlen a ni.
Tribe list siamtha turin PC-in sawrkar hnenah thlen
![](https://theaizawlpost.org/wp-content/uploads/tap_logo-min-large.jpg)