West Bengal-a rorel lai Trinamool Congress te chuan an state chhunga inthlan awm tawh zawng zawng zinga an vote hmuh san ber a thleng a, West Bengal Panchayats inthlan an neih zawh takah khan mipui vote 51.14% an hui thei a ni. Hemi hmaa Trinamool Congress ten an vote hmuh san ber chu kum 2021 Assembly Election kha niin vote 47.8% an hmu a ni. June 8, 2023-a panchayat inthlan neih zawh takah BJP chuan vote 22.88% an hmu a, CPI (M) chuan 12.56% vote hmu ve in, Congress in 6.42% leh Indian Secular Front (ISF) te chuan 2% votes an hmu ve bawk a ni. Inthlan chhawng thum neihnaah hian Trinamool Congress te hi an che hha hle a – Gram Panchayat Samitis seat awm zawng zawngah seat 79% lain hnehna an chang a, Panchayat Samitis ah 92% leh Zilla Parishads ah 100% seats te lain hnehna an chang a ni. A number zawnga sawi chuan Gram Panchayats inthlan neihna zawng zawng seats 3,317 ah Trinamool Congress chuan seats 2,634 lain chiang takin hnehna an chang a ni.
Hetih lai hian Left Front hruaitu, Congress leh ISF te chuan inthlan laia tharum thawhna thleng an duh lohzia entir nan Ningani khan Kolkata khawpui chhungah pun khawm an huaihawt a ni. He pun khawm huaihawtnaah hian CPI (M) hruaitu leh state Secretary ni bawk Md.Salim leh Left Front Chairperson Biman Bose te pawh an tel a ni. Hemi ni hian BJP atanga palai palite aiawh leh Union Minister pawh lo ni tawh Ravi Shanker Prasad chuan state Governor C.V. Ananda Bose hmuin Chief Minister Mamata Banerjee chuan mipui lungawilote thu leh hla a bengkhawn duh loh thu a sawi ve bawk a ni.
Trinamool Congress te vote hmuh san ber thleng
