Tripura-a tui lian vangin
chhungkaw 250 insaseng
Tun hnaiah ruah sur nasa avangin Tripura-a South Tripura-ah chuan tui nasa taka lianin chhungkaw 250 chuang chu an in leh lo chhuahsan ngaiin an awm phah.
Nilaini chawhnu atang khan tui hi kâm leh hret mah se chhungkaw 250 chuanga mihring 840 chu an inah an la haw thei lo niin District Magistrate Md Sajad P chuan a sawi a. Heng chhungkuate hi relief camp 16 an siamah khawsaktir an ni tih a sawi bawk.
Muhuri River-a tui chuan hlauhawm chin chhinchhiahna, metre 15.70 chung lam chimin a kam velah tui a tilian nasa hle a. A kam lehlam lehlema hmun hniam lai, Belonia leh Santirbazar subdivision huam chhunga hmun tam tak a chim a ni.
District hotupa hian invenna atan leh nunna chân an awm loh nan Nilaini leh Ningani khan an district-a sikul leh anganwadi centre zawng zawng kharna tur thupek a tichhuak a. Chhanchhuah hna thawktuten hmun him lova awmte sawn chhuah hna an thawk zewl bawk.
“District thuneitute chu eng thil pawh thleng se hmachhawn thei turin an inbuatsaih vek a. National Disaster Response Force (NDRF) team-in Belonia an thleng tawh a, chhawmdawlna thila thawh tur tul ang pawh thawh mek zel a ni,” a ti.
Chief Minister Dr Manik Saha pawhin an South Tripura district-a tui lian hi a vil reng niin district magistrate chuan a sawi a, thil thleng thar apiang hriattir nghal zel a nih thu a sawi bawk.
Tui hi hmun thenkhatah kâm deuh tan mah se hmun hniam zual laia chengte chu inring reng turin an ti bawk tih officer chuan a sawi.
India Meteorological Department (IMD) chuan South Tripura-ah hian ruah la sur chhunzawm tura sawi lawkin ‘yellow alert’ (inrin ngai) a pe chhuak a, ruah tam tak sur thei leh tek leh rial pawh thawk thei a ni tih an sawi lawk a ni.
Tripura-a tui lian vanginchhungkaw 250 insaseng
