Tripura land revenue inrelbawl dan zirchian pahin Mizote nen inkawm

Tripura land revenue inrelbawl dan
zirchian pahin Mizote nen inkawm
Tripura sawrkar Land Revenue department kalphung leh inrelbawl dan zirchianga Revenue official-te nena kal Land Revenue & Settlement minister B Lalchhanzova chuan official-te a kawm hnu ah Tripura-a Mizo awmte kawmin an harsatna leh mamawh sutkian dan tur a ngaihtuahpui.
LR&S minister B Lalchhanzova leh department official-te hi Tripura sawrkara Revenue department kalphung zirchiangin November 27 & 28 khan Agartala-ah hun an hmang a. Tripura chief secretary JK Sinha hoa lo dawngsawngin, hmalam hun zela thawhhona tha tak neih theih a beisei tih a lo hrilh. Tripura-a Revenue department official-te chuan an state-a an tih dan tha leh an lo hlawhtlinpui tawh chu sawifiahin, Mizoram Revenue hotute zawhna an chhan bakah sawiho zui a ni.
Food Civil Supply & Consumer Affairs minister ni bawk B Lalchhanzova hi Tripura FCS&CA minister Sushanta Chowdhury chuan lenchilhin, Tripura leh Mizoram chu nasa zawka inpawh a, thawhhona tha zawk neih dan kawng dap nise, tiin an sawidun a. B Lalchhanzova hian Agartala Mizo Welfare Association-in a hnena mamawh leh harsatna an thlen chu Tripura minister hi sawipui nghalin, a theih anga a lo ngaihven tur thu leh Mizo Welfare hian amah lo hmu se, theihtawpin an harsatna lo buaipui a inhuam tih a hrilh a ni.
Tripura chu India hmarchhaka land revenue administration nei tha bera sawi a nih avanga zirchiang tura kal an ni tih Mizoram Revenue minister hian a sawi a. State dangte inrelbawlna tha zira exposure neih chu thil tul tak a nih angin, helama hmahruaitu Tripura tlawh a ni chu lawmawm a tih thu leh Mizoram atanga kalten thil tha tam tak an zirchhuah ngei a beisei thu a sawi. Chu’ng zingah chuan land revenue administration-ah district bawrhsap/ magistrate (DC/DM) ten mawhphurhna lian zawk an lak a pawimawh thu te, land record pawh a phuisui zawkna atan DC/DM kutah awm se tih te, Land Revenue department chu tunlai thiamna thar nena thuam chak a ngaih avangin he department-ah hian IT Cell mumal tak siam leh legal officer dah thuai a tul thu te an zirchhuah pawimawh tamtak zinga langsar a ni tih a sawi a ni.
Mizoram minister hian Agartala-a Mizo awmte nen Community Outreach Programme an hmang a. Tripura-a Mizo chengte chu Mizoram sawrkarin a ngaihven tih sawiin, ram pawna Mizo chengte hmakhua ngaiin Mizoram chief minister office hmalakna in khawvel huapa Zofate kuahkhawm tur Diaspora Cell din a ni tih a sawi. “Mizoram siamthat hna kal mekah ram chhung leh pawna awmten an ngaihdan zau taka an sawi theihna tur remchang siam tam a tul hle a, sawrkar neitu mipui rawtna leh ngaihdan ngaihthlak sak zel hi a remchang dan anga kalpui zel a tul a ni,” a ti.
Inkawmkhawmnaah hian Agartala Mizo Welfare Association leh Agartala Mizo Service hruaitute bakah Synod Mission Board hnuaia Tripura Mission Field, Baptist Church of Mizoram Field , Evangelical Church of Maraland leh Salvation Army hnuaia thawktute bakah Tripura sawrkara Mizo officer-te leh zirlai engemawzat an tel a. Minister hnenah hian an mamawh leh thil tul an thlen.
Agartala-ah hian Mizo, Agartala Mizo Welfare Association-a inziaklut hi 500 vel awmin, heng mitea an hman tur Mizoram House emaw Mizo Run din chu Agartala Mizote mamawh tak a ni tih sawi a ni a. Aizawl leh Agartala inkar thlawhna thlawk awm lo, kawngpui inkalpawhna tha tawk lo, bus service an mamawh dan, maxi cab service thin kal dan enfel sak an mamawh thu an lo sawi a ni.