Mizoram Truck Driver Association (MTDA) chuan FCI kudam Tanhrila buhfai an lakna turah Tanhrila an dinnaah Traffic Police-in dil phalsak loa a man avangin an tan buhfai load ngaihna a awm loa, vawiin – August 19 atang hian thu leh awm hma chu Tanhrila FCI kudam atangin buhfai phurhchhuah an tum lo tih an sawi.
MTDA thuchhuak chuan Tanhrila FCI kudam atanga buhfai load chungchangah hian kum 2017 May 29 khan khatihlaia FCS&CS minister hoin an sawikhawm a, hemi hnua bawhzui zelnaah truck leh Mizoram University bus tlan vel tibuai loin marking siam a ni. Hemi atanga tun thlenga harsatna leh buaina nei loa an kal laiin, August 16 khan Traffic SP thupek angin Traffic Police-in buhfai phurh tur nghaka truck ding engemawzat an man a, an driving license laksak an ni a. MTDA hruaitute hmalakna in driving license mansak pawh hi an inpe kir leh tih a sawi.
August 17 khan Traffic Police hi kal lehin, load la tura kawngsira ding truck ho chu ding tawh lo turin an ti a. Hei vang hian Tanhril atanga buhfai load lak rih lo nise tiin association chuan an rel ta tih an sawi a ni.
Truck driver-ten buhfai phurh loh tum
