Trump-a Board of Peace-a tel tura sawmna Israel-in pawm
Israeli Prime Minister Benjamin Netanyahu-a chuan US President Donald Trump-a Board of Peace-a tel ve tura sawmna chu a pawm ta.
A office chuan Netanyahu-a hi ‘khawvel ram hrang hrangtute awmna’ board-ah hian member a ni ve dawn tih a puang a ni.
Board hi a tira ruahman dan chuan Gaza-a Israel leh Hamas te kum hnih an indo mek titawp tur tur leh an intun din lehna tura puitu tur a ni a; mahse, kal dan tur rawtna awmah chuan Palestinian-te tana ram siam a lang tawh lo va, UN hnuaia awm tur anga tih a ni.
Pope Leo-a pawhin board-a tel tura sawmna hi a danwg niin Nilaini chahwnu khan Vatican palai lawkin a sawi bawk.
“Chhanna pek hmain eng eng emaw ngaihtuah tel ngai a awm dawn niin ka hria,” tiin Cardinal Pietro Parolin-a chuan thuthar lakhawmtute a hrilh.
Tunah hian Bahrain, Egypt leh United Arab Emirates chuan an tel tur thu an sawi tawh a. Albania, Armenia, Azerbaijan, Belarus, Hungary, Kazakhstan, Morocco, Turkey leh Vietnam hruaitute pawhin an tel dawn tih an sawi tawh bawk.
Trump-a’n board thar a dinah hian ram engzat nge sawm an nih hriat a ni lo va; Canada, Russia, Turkey leh UK te chu sawm zingah an tel ngei a, an chhanna erawh an la sawi lo hlawm.
Norway chuan kal dan tur ruahmanna awm mekah ‘sawi fiah ngai tam tak’ a la awm avangin an tel ve dawn lo tih an sawi a, France leh Sweden pawhin hetiang chhanna pawh hi an neih rin a ni.
Chanchinbuten Board of Peace nihphung leh kal dan tur (charter) ruahmanna siam chhin an hriat rukah chuan member ramte hi kum thum chhung zel telin member nihna a tihnun leh theih dawn a, member nghet ni turin board hnenah $ tluklehdingawn 1 an thawh a ngai dawn a ni.
Charter-ah hian board hi ‘nghehna, mahni kea dinnna leh dan kengkawh thei sorkar awm theih nana khawvel huap pawl; a tuartute tan himna a awm theih nana beihtu’ tia dah a ni a. An hmalakna chu ‘khawvel dan zam zulin muanna a awm theih nana chet’ tih a ni bawk.
Trump-a chu chairman a ni ang a, US aiawh ‘mi hrang’ an awm dawn bawk a. US thuneitu pakhat chuan chairman nihna hi Trump-a hian ‘a bansan hma chu a chelh dawn’ niin a sawi a, an ram aiawh tur bik chu US president tharin a ruat ve thung dawn a ni.
Chairman hian a tul chuan ‘Board of Peace hmalakna siam, tihdanglam leh thiah theihna’ a nei dawn niin charter put ru-ah hian tar lan a ni a. Kum hnih hun nei zel tur Executive Board-a tel tur hruaitu tur a thlang thei bawk ang.
Zirtawpni khan White House chuan Executive Board-a tel tur mi pasarih hming a puang tawh a. US Secretary of State Marco Rubio, Middle East special envoy Steve Witkoff, Trump-a makpa Jared Kushner leh British prime minister hlui, Tony Blair te an tel.
Trump-a hian Bulgarian politician leh UN Middle East envoy thin, Nickolay Mladenov-a chu a ruat tel bawk.
UN Security Council chuan November khan Board of Peace hi ‘Gaza tun dina a awma sum thawh leh hna thawh tur ruahmantu atan thuneitu insiam rem chhunga thu lo nei turin’ a pawm a. Kum 2027-a tawp turin a ti bawk.
Israel leh Hamas indona hi US palaina avangin inkahhai an puang mek a. A thawh hnihnaah kalpui tan leh turah Board of Peacce hi a pawimawh a ni.
Trump-a Board of Peace-a tel tura sawmna Israel-in pawm
