Tun tum US President Donald Trump-a UK zin chu khualtha ber thlenin an lo thleng a, Windsor Castle lamah British lal chhungkuain lo mikhualin, a puala ruai an buatsaih pawh a pui tham khawp mai.
Trump puala ruai hi Windsor Castle-a St George’s Hall-ah an theh a, an ruaithehna hmun hi kum 1,000 dawna upa a ni tawh. Windsor Castle hi khawvela castle luah lumtu la nei zinga lian ber leh upa ber niin an sawi thin a, 1066-a William I-a’n a sak atanga vawiin thlengin luah lumtu an la awm reng a ni.
Trump puala ruai an buatsaihna dawhkan pawh an chei ropui khawp mai a, dawhkan feet 155 vel zeta sei chu bati 139, chaw ei nana hman tur fork, fiante leh chemte tih vel pawh 1500 vel zet an chhawp a, ruaitheh te ei leh in vel viltu pawh mi 100 chuang an ni. Lal chungkaw lam official-te chuan an ruaithehna dawhkan an buatsaih vel nan hian kar khat vel zet hun an hmang niin an sawi.
Ruai kil laia an thutna tur pawh an rem uluk khawp mai, King Charles III dinglamah Trump a thu a, a veilamah US Secretary of State Marco Rubio a thu ve thung a, Trump-a bulah Princess of Wales Catherine Middleton a thu bawk. King Charles III ep chiahin Queen Camilla a thu a, a dinglamah Melania Trump thuin, a veilamah US Treasury Secretary Scott Bessent a thu a, Melania bulah Prince William a thu bawk. Ruai kiltute hi US leh UK ram hruaitu lu te niin, Trump-a fanu Tiffany leh a pasal te pawh an tel a, tech company lian Nvidia hotupa Jensen Huang leh OpenAI atangin Sam Altman te pawh an tel.
An ruai menu pawh chhawng eng emaw zah niin, Hampshire watercress panna cotta leh parmesan shortbread bakah quail edd salad-in bul an tan a, a ruai pui ber (main course) atan organic Norfolk chicken ballotine courgettes a tuam an hmang a, dessert atan vanilla ice cream bombe, Kentish raspberry sorbet leh poached Victoria plum an hmang bawk.
Donald Trump hian zu a in ngai lo nain, a in duh te tan he ruaiah hian zu an sem reng tho a, Buckingham Palace-in an tarlan danin, Donald J Trump-a US President 45-na leh 47-na a nih lawmpui nan 1945 Warre’s port wine an sem a, Trump-a nu, Scotland a piang, pualin a pian kum 1912 nena inrem zaih maiin 1912 Hennessy cognac an sem tel bawk.
Trump-a pawhin nuam a ti hle a ni ngei a, ruai an kil hmaa a thusawia, “Ka dam chhunga chawimawina ka dawn tawha ropui ber te zinga mi a ni,” a ti.
Trump-a pualin Windsor Castle-ah ruai ropui an \heh
