USA president thar Donald Trump-a’n ro a rel a, tunlai khawvela ram pawimawh an ni bawk a, khawvel ram hrang hrang a nghawng mek. Mizoramah pawh nghawng a nei.
USA-in sum hmanga ram dang a tanpuina an titawp rih a, hei hian Mizoram pawh a nghawng. Ngawr natna (TB) dona lamah nghawng a nei mek.
National TB Elimination Programme hnuaiah NGO pakhat, Piramal Swasthya a awm a, Guwahati-ah regional office neiin, hei hi hmarchhaka an hmunpui a ni. Anni hian Mizoramah ngawr natna um bo kawngah an thawh hlawk a, Mizoram sorkar nena tang dunin, a thawktu mihring leh khawl lam pawh an neih that avangin an tangkai hle. Mahse Trump-a policy vangin anni hian Mizoramah hna an thawk thei ta lo.
Thu dawn danin, US sorkarin ram dang a tanpuina sum a tihtawp avangin Piramal Swasthya te hian Mizoramah an hna an thawk thei tawh lo a, USA atanga sum an hmuh thin a tawp tak avangin February ni 25 khan Mizorama hnathawkte pawh bantir an ni.
Piramal Swasthya hnuaia Mizorama thawkte hi mi 55 an ni a, Mizo vek an ni. X-ray technician te, community facilitator te, ngawr natna um bona lama thawk mi hrang hrang an ni.
Thu dawn danin, khawl leh hmanrua an nei tha a, portable x-ray phei chu hmun kilkhawr ber berah pawh ken kual theih, Artificial Intelligence hmanna, hmarchhak state dangin an nei ve em tih tur khawp a ni a, an hmanraw dang pawh a tha. An hmanruate hi tuten nge chang ang tih hriat a ni rih lo.
A thawktute bakah an hmanruate hi ngawr natna dona atana Mizoramin a hman tangkai ber berte a ni a, 2023-ah Mizoram sorkar nena thawk dun tan an ni a, Mizoramin a tangkaipui hle.
Hna an thawk thei ta lo hian Mizoram sorkarin ngawr natna dona campaign, ni 100 chhung neih tur a tih, March ni 17-a zawh hman tur pawh a nghawng tih thu dawn a ni.
Trump-a rorelin Zoram a nghawng
