US president hlui Donald Trump chuan November thla a US president thlanna a thlan tlin a nih chuan Chinese bungruahah chhiah tam zawk lak a ni ang, tiin a sawi.
Fox News tena an interview naah chhiah an lak chu 60% chuang a ni ang a ti a. “Kan tih ngei ngei a ngai,” tiin a sawi zui bawk.
Trump hi Republican party frontrunner ni mek a ni a, mahse criminal charge hrang hrang nei mekin chung zingah chuan kum 2020 election result thlak danglam tuma puhna te pawh a tel a ni.
Hun rei tak chhung chu China chu trading practice fel lo tak kalpui leh intellectual property theft kalpuiah a lo puh tawh a ni.
“China hi tihnat ka tum a ni lo, China nena inthianthat pawh ka duh a ni. Mahse, kan ram hi an advantage atan an hmang nasa lutuk a ni,” tiin Republican Party presidential nominee chuan a sawi a.
A president lai khan Trump chuan khawvela economy lian ber pahnih chu trade war-ah a pawt lut a, Chinese bungrua dollar billion telah chhiah a la sang vak a ni.
Kum 2018 khan Chinese bungrua lakluhah chhiah lakna a kalpui tan a, a hnuah bungrua chi hrang hrang seafood atanga chemical lam thlengin a tisang zui zel a. Beijing pawhin chhang let ve zuiin US atanga soybean, wheat leh poultry a lakluhah chhiah a tisang zui bawk.
US President Joe Biden administration chuan chung chhiah laksan te chu a ngai angin a dah zui deuh vek thung a, mahse sawisel hlawh thungin thil man tisangin US chu competitive lo zawkah a siam an ti ve thung.
US hi China-in kum sawm hnih chhung vel zet chu a export market lian ber a ni tawh a ni.
Trump-an Chinese bungrua tax tihsan tiam
