Trump-a’n FTO-ah Houthi a dah let leh

Trump-a’n FTO-ah Houthi a dah let leh
US President Donald Trump chuan Yemen-a Houthi-te chu Foreign Terrorist Organisation (FTO)-ah a telh leh.
“Houthi-te chetna hian American civil mi leh Middle East-a chengte a tiderthawng a, kan ram thian hnaite himna a tinghing a, tuipuia khawvel sumdawnna kal vel an tibuai bawk,” tiin executive order a siamah a tar lang.
US Agency for International Development (USAID) chuan he thupek thar avang hian an thawhpuite chuan Yemen-a buaina siamtu Houthi hming kaihhnawih sum pek an tihtawp a ngai a, Iran-in a puih pawl sawiseltu lo tihlet an tihtawp a ngai bawk tih a puang nghal.
President kal chhuak ta, Joe Biden-akhan kum 2021 khan FTO atangin a paih a, khawvela mihring manganna ber pakhat thlenna hmunah tul dang avanga tih ngai niin a sawi.
Yemen hi kum 10 kal ta atang khan tual chhung indona avangin a buai tawh a. Houthi hian ram dangten sorkara an pawm kut atangin an ram hmarthlang lam zau tak an thunun tawh a, Saudi kaihhruai tangrual eng emaw zatin US puihna nen sorkar pangngai din leh tumin hma lak a ni.
Indona avang hian mi 1,50,000 chuang an thi tawh a, nunau an mangang em em a, mi maktaduai 4.8 vel tlanchhiain mi cheng zahve vel, maktaduai 19.5 chu eng kawng emaw tala puih ngaiin an awm mek bawk.
Hetiang hi an dinhmun ni mah se Biden-a chuan nikum January khan FTP aia nem hrep, Specially Designated Global Terrorists (SDGT)-ah Houthi hi a dah.
SDGT-a Houthi dah an nih khan US financial institution-ten Houthi sum neih khawih chet theih lohvin an siam a, an member-te chu US atangin khap vek an ni.
FTO-a dah hi chuan US a ni emaw, ram dang atang pawhin ni se Houthi thlawpa puihna thil pete chu US dan hrang hrang tlawhchhana hrem theih an ni.
Mihring dikna chanvo humhalhtu pawl chuan hetianga tih an nih hian Yemen-a mihring chen tamna lai, Houthi thununna lai hmun atanga an chetna tur tam tak a dang niin an sawi.
Trump-a thupek siam thar hi Houthi hruaituten engtin mah an la chhang lo.
Hetih lai hian anmahni thunun, Houthi-controlled Public Corporation for Radio and Television hotu, Abdul Rahman al-Ahnumi erawh chuan Yemeni-te tihnat an nih chuan ‘indonaa chhat let’ ze; an nih tur thu as awi.
Khawvelin a pawm, Yemen-a presidentian council hotu, Rashad al-Alimi erawh chuan Trump-a thiltih chu lawmawm a tih thu a sawi a, ‘Yemen-a muanna leh nghehna a awm theihna tur pawimawh’ niin a sawi.