US President Donald Trump-a chuan US leh India inlaichinna chu a ngaihsak hle niin India-a US Ambassador Sergio Gor-a chuan White House-a president a kawm hnuah a sawi.
“Ni eng emaw zat US-ah ka châm a. A hmasa berin White House-ah kan president ROPUI tak nen kan inhmu leh a. President hian US leh India inkar boruak hi a ngaihsak hle a ni,” tiin Gor-a hian Thawhlehni zan khan X-ah a tar lang.
Gor-a hian Oval Office-a Trump leh Secretary of State Marco Rubio te nena an thlalak a dah chhuak bawk.
Gor-a hian kumin January khan India-a US palai hna hi a chelh tan a. Hemi hma hian White House Presidential Personnel Office-ah director hna a chelh tawh bawk.
Hemi hma hian US Special Envoy for South & Central Asian Affairs hna a thawk bawk.
Washington-in thawk khat laia sumdawnna thila India a hrem avang khan an inkar a chhe hman a. Trump-a sorkar hian Delhi-in Russian tuialhthei a lei nasat avanga hrem nan bungrua a lak luhsak thinah chhiah 25% a lak mek tipungin hrem nan 25% dang a laksak a. Tuialhthei lei chungchangah hian hun eng emaw chen an inkar a khi hman a ni.
Tunah erawh Trump-a hian hremna hi a hlihsak tawh a. An inkar pawh a ziaawm leh tawh a, Gor-a India-a a awm hnuah phei chuan a tha lehzual tawh a ni.
Trump-a’n India-US inlaichinna ngaihsak tha – US palai
