Trump-a’n indo titawp tura hma an laknaa lawm nachang hre lovah Ukraine puh
President Donald Trump-a chuan US-in Russia-Ukraine indo titawp tura hma a lak meknaah Ukrainian hruaitute chu ‘lawmna chang pakhat mah hre lo’ niin a sawi.
Ukraine leh European an thawhpuiten US palaite nen Geneva-a indo tihtawpna tura rawtna an neih, nasa taka put rua Moscow hlawkpui theih tur ang tam tak a awm nia hriat an sawiho mek laiin Trump-a hian hetiang hian social media-ah a tar lang a ni.
Ukrainian-te nen an indawr meka an chawlh laiin US Secretary of State Marco Rubio-a chuan, “Kan thlen tawh chinah chuan rah tha chhuah leh awmze nei tak a ni,” a ti a. Ukrainian palai chuan anni chuan ‘muanna lam hawi chauh’ an zawng an tih a sawi ve bawk.
President Volodymyr Zelensky-a chuan a hnuah ‘a mi mal takin’ Trump-a chunga a lawm thu a sawi.
Kar hmasa tirah khan Zelensky-a hian Ukraine chu ‘an zahawmna hloh nge, an thawhpui hloh’ tih inkarah an awm tih a lo sawi tawh.
February, 2022 atanga Ukraine beitu, Russian President Vladimir Putin-a chuan US ruahmanna chu inremna ‘bulthut’ a ni thei tih a sawi ve bawk.
Rubio-a’n Pathiannia Ukrainian-te a kawm mek laiin Trump-a hian a Truth Social platform-ah Russia-Ukraine indo chu US leh Ukrainian hruaitu ‘chak leh dik’ awm se a chhuak lo vang tih a tar lang a. Hawrawppuiin Ukraine-a ‘hruaitute’ chu US-in muanna a awm theih nana hma a laknaah lawm thu hrilh lo niin a sawi bawk.
US president hian Kyiv thawhpui tam tak awmna, Europe chuan Russia atangin tuialhthei an la lei reng bawk niin a tar lang bawk a. Moscow tan tuialhthei leh boruakalhthei an hralhna sum chu Ukraine nena an indonaa an sum hnar ber a ni.
Geneva-a inbiaknaah hian US, Ukraine, Britain, France leh Germany-a hruaitu lawk tak tak telin Inrinni zan zanriah ei kham atangin an tan a, inkhar hnanin indo a tawp theih nana US rawtnate an sawiho a ni.
US rawtna put ruah hian point 28 awmin Ukrainian sipaite Donetsk region chhak lam, tuna an thunun mek atang bakah Russian thunun lai Donetsk leh an thenawm, Luhansk region atanga an inhnuk kirna tur te a tel.
Ukraine chhim lama Kherson leh Zaporizhzhia region-a ramrite leh indona awm mekna khawih chet theih lohva dah te a tel a, region pahnih hi tlem azawng Russia-in a thunun ve ve a ni.
US rawtnaah hian Ukrainian sipai 8,80,000 awm mek 600,000-a tihtlem pawh a tel.
Indona chhuah chhan pakhat, Ukraine chu Nato member a nih theihna erawh ziah lan a ni lo va, Kyiv-in ‘venhimna rintlak tak’ a dawn tur thu erawh a tel a, a kimchang erawh a tel lo.
Russia hrekna hlipa G7 zawma G8 siamna tur a tel bawk.
Russia hian Ukrainian ram 20% vel awp tawhin an sipaiten hma an sawn hret hret bawk.
Trump-a chuan Ukraine hi November 27 hmaa an rawtna pawm turin a nawr mek a. Hetih rual hian Europe, Canada leh Japan atanga aw chhuah an awp hnuah hei hi Kyiv tana an rawtna neih hnuhnung ber a nih loh thu a sawi leh tawh bawk.
Trump-a’n indo titawp tura hma an laknaa lawm nachang hre lovah Ukraine puh
