Trump-a’n pui turin min ngen – Zelensky

Trump-a’n pui turin min ngen – Zelensky
US chuan Iranian drone laka Gulf tangrual ramte venhimna kawngah Ukraine tanpuina a dil niin President Volodymyr Zelensky-a’n a sawi.
Ukraine thawhpui ramten an be nasa hle tih sawiin, ‘American lam atang pawhin ngenna’ a awm tawh tih a sawi a ni.
Zelensky-a chuan inkaihhruaina a tihchhuah tawh thu sawi a, ‘himna mamawhna hmuna a tul anga che chhuak thei turin Ukrainian specialist-te chah an ni’ a ti.
Ukraine-in puih a inhuam chungchang zawhna pawh US President Donald Trump-a chuan chhangin, “Ram eng atang pawhin tanpuina eng pawh ka la ang,” a ti.
Hemi hma hian Zelensky-a hian Ukraine chuan an ram invenna tihchak loh phah tur ni lovin Kyiv tan inthian thatnaa hlawkna awm thei atan a pui dawn tih a lo sawi tawh a ni.
A bik takin Ukraine hian Russian ballistic missile laka invenna atan a interceptor drone-te chu US Patriot air defense tam zawk nen inthleng a rawt tawh a ni.
Middle East-a indona avang hian Ukraine-in a thawhpui ramte chu buainaah hnuk lutin hei hi an ram pawhin a tuar thei ang tih hlauhna a siam a ni.
Interceptor missile tlakchham theihna tur leh Russia-in tuialhthei man sang chhoh avanga hlawkna a hmuh theih tur pawh ngaihtuahna a awm thei a, hei hi Moscow hian indona atana sum a hmuhna pawimawh tak a ni.
Zelensky-a hian heng hlauhawmnate hi a pawm a; mahse, Ukraine hlawkna atan buaina hi hmang tangkai a duh hle niin a lang.
Gulf-a UAE, Qatar, Bahrain, Jordan leh Kuwait-a a thawhpuite a kawm tawh a, Iran beihna lak atanga an sipai hmunpui leh sorkar hmun pawimawhte venhimna tura pui turin a intiam a ni.
Zelensky-a chuan social media-ah, “Ukraine hnena an ngenna ber chu eng nge ni tih a chiang hle,” a ti.
“Iran-in beihpui a thlak tuartute pawhin harsatna lian tak, Shahed an hmachhawn a. Hei hi thiamna mumal leh hre tawk lo chuan lo dan har tak a ni,” a ti.
“Mipuite invenna tura puih leh supply kawng pawimawh tak takah dinhmun nghet siam leh hi kan thatna tur vek a ni bawk,” a ti.
“Shahed laka invenna kawnga tanpuina dil turin kan thawhpuite chuan Ukraine an pan mek a – thiamna leh a taka chet chhuah ve an dil a. American lam atang pawhin ngenna pawh a awm tawh a ni,” a ti.
Ukraine hi kum tam tak chhung chu Russia siam Shahed drone – Iranian duan hmanga siam, unmanned aircraft nena lo inbei nasa tawh a ni.
US hian Russia-in a beih mekah sipai thila Ukraine puih chu a titawp a; mahse, Kyiv hi drone leh missile laka invenna leh Russia ramril kah theihna tura puitu tur intelligence pawimawh tak tak a pe chhunzawm zel tho.
Kum tam tak chhung Ukraine-in tanpuina a dil hnuah hun kal zelin Zelensky-a hian tun hun hi indawrna, sipai leh sum leh pai lama hun remchang atan hman a duh tih a chiang hle a ni.
Ukraine hian Gulf-a American tangrual ram, a bik takin Saudi Arabia a puih theih chuan US a lawm a beisei.
Arab ram atang pawhin duhsakna a hlawh theih a beisei a ni a, heng zinga thenkhat hian Russia nena inzawmna nghet tak an nei a, Ukraine buainaah pawh inrawlh duh lo an ni.
Gulf atanga palaite chu sawiho turin Kyiv an thleng tawh a. Thu dawnna pakhat chuan thenkhat chu inremna an siam hma chu Ukraine khawpuiah awm reng turin an hrilh nia sawi an ni a. UK hian Qatar tanpui dan tur a zawng mek bawk niin an sawi.
Zelensky-a hian Gulf ramte air defence-a a puih chuan Patriot missile man to leh tha hmanga drone man tlawm kah thlak an chin a tihtawp theih beiseina a awm bawk.
Ukraine hian Patriot air defence tlakchhamna a tawk mek a, Kyiv hian Middle East-a pek leh hman ral nasat lutuk chu a duh lo ngei tura ngaih a ni.
Zelensky-a hian Nilaini khan chanchinbu mite hnenah tun hnaiah Patriot PAC-3 missile 800 vel hman a ni tawh tih a sawi a, indona chhung zawnga Ukraine-in a dawn aia tam a ni tawh a ni.