US President Donald Trump-a chuan Turkiye hrekna a hlih dawn thu a sawi a, F-35 a leitir thin pawh a chhunzawm leh dawn em tih thutlukna siam thuai a ni dawn tih a sawi.
Thawhlehnia Turkish President Recep Tayyip Erdogan-a nen Ankara-a NATO leaders’ summit-a an inkawm hnuah he thu hi a sawi a ni.
Turkey hian kum 2009-a Russian S-400 air defense system a lei hnuah US hian F-35 a hralh thin chu a titawp a, Washington hian Countering America’s Adversaries Through Sanctions Act (CAATSA) an tih hnuaiah a hrek bawk.
Trump-a chuan, “Hrekna hi kan la hlip dawn a ni,” tiin thuthar thehdarhtute a hrilh a. Erdogan-a bula thuin Trump-a chuan Turkiye hnena US F-35 fighter jet hralh chungchangah thutlukna a siam thuai dawn tih a sawi bawk.
“Thutlukna kan siam dawn a… thlawhna ropui tak, tha ber a ni a, kan ngaihtuah tur thil a ni ang,” a ti.
Turkiye hnena F-35 hralh leh tur hian kum 2020-a dan siam, Ankara-in Russian siam system a neih tawh loh leh a enkawl tawh loh phawt tura thu dah chu a paltlang a la ngai dawn a ni.
Hetihlai hian CAATSA hrekna hian Turkiye-a Presidency of Defense Industries chu a bik takin a bitum a, US-in thil a thawn bakah sum leh pai leh bank-a khapna pawh a huam tel bawk.
Erdogan-a chuan F-35 chungchangah hian ‘thu lawmawm’ an hriat a beisei thu sawiin a hmain Turkiye chu jet panga siam tura tiam a nih thu thuthar thehdarhtute a hrilh bawk.
Trump-a’n Erdogan-a a kawm mek lai hian Israeli Prime Minister Benjamin Netanyahu-a chuan US hi Turkiye hnenah F-35 hralh tawh lo turin a kar ve mek bawk.
Tun hnaiah Turkiye leh Israel inlaichinna hi a tlahniam hle a, Israel-in Gaza laka indo a kalpui hmain ram pahnihte hian sumdawnna lama an inzawmna a tipung nasa hle a. Turkiye hian Palestinian-te chennaa Israeli sipaite beihpui thlakna chu a sawisel nasa hle a ni.
Turkiye hnena F-35 hralh chungchanga thil inthlak chu US senator-ten eng angin nge an ngaih dawn tih a la hriat loh va. Hetih lai hian Thawhlehnia Turkiye Today-in a kawmnaah Israel thlawptu nghet tak, Republican US Senator Lindsey Graham-i chuan hma lam hun tur a inhawng tih a sawi.
“Congress-ah duh lotu eng emaw zat a awm mai thei a; mahse, a chin fel dan tur pawh a awm mai thei bawk,” a ti.
Trump-a’n Turkey hrekna hlip dawn, F-35 pawh leitir leh mai thei
