Florida Governor Ron DeSantis chuan May 24 khan Republican presidential nomination nih tuma hma a lak tur thu sawiin president hlui Donald Trump nen an inhmachhawn dawn ta a ni.
DeSantis hian Twitter CEO Elon Musk nena sawihona an neih dun hunah official-in a tichiang dawn a. Chumi hnuah Federal Election Commission-ah candidate a nihna a tichiang zui ang.
DeSantis hi nikum November thla lawk khan a term hnihna chelh tura thlan tlin a ni a. Republicans lamah ho ngah zelin Trump an White House luah tura Republican nominee nih a tumna dal thei ber tura ngaih a ni.
DeSantis leh Trump te hi Trump an White House a luah laia inzawmna nei tha tak an ni a, DeSantis-an Governor term khatna chelh tura a beih lai pawhin Trump chuan a thlawp tha hle a ni. Mahse, chumi hnuah De Santis chuan amahin political identity dang siamin kum 44 chauha upa niin kum 76-a upa Trump ai chuan hma lam hun nei eng zawk thei a ni bawk.
Coronavius pandemic len lai khan DeSantis chu hmaituamna duh lo pawl leh vaccine tihmakmawh dodaltu leh Dr. Anthony Fauci, Trump leh Biden administration a Covid-19 response enkawltu ber langsar taka sawiseltu a ni.
Thusawina a neihah a policy kalpui chuan pandemic hnuah Florida econmic recovery a siam tiin a sawi a, tunah chuan Florida chuan mi sang tam tak cheng turin a hipkhawm tiin a sawi a, Florida chuan US chu growth lama kum hnih chhung a khum tawh tiin a sawi bawk.
“Pandemic a hmachhawn dan avang khan Red State America governor riaua ngaih a nih phah” tiin Justin Sayfie, Florida lobbist leh Florida Govenror hlui Jeb Bush thuihruai thin ni bawk chuan a sawi.
Presidential nominee nih a puan chian hmain DeSantis hian Iowa leh new Hampshire te pawh tlawhin hma a lo la sa tawh bawk a. Chutih laiin a hma pawhin langsar takin Trump chuan ram pum huapin DeSantis chu na takin a lo bei lawk sa tawh bawk.
DeSantis hian amah seltute chhang letin, a ngaihpawimawhte chu legislature hmanga kalpuiin a hmelmate a hrem thin tia sawi a ni a. Kum 2022 re-election campaign a a elpui ber Democrats Charlie Crist chuan DeSantis chu ‘wannabe dictator’ tiin a sawi.
Flora-a hnathawk ngah ber pakhat Walt Disney Co tena school a LGBTQ issue sawi phal loh tuma ‘Don’t Say Gay’ tih kalpui an tum hnuah DeSantis chuan an company chu self-governing status an neih hlihsakah a vau hmiah bawk a.
Disney te hian Governor DeSantis lakah hian federal lawsuit an kalpui nghal a, State sorkar thiltihtheihna chu an company beih nana hmang tiin an khing a ni.
Democratic state attorney eleted pakhat chuan DeSantis-an nautihtlak bituk neih ni se a tih bawhchhiate tumah hrem a tum lo tih a sawi hnuah DeSantis chuan a nihna atangin a ban zui tih a ni bawk.
Republicans tena an duh loh em em “woke” education policy duhlohna te chu a politics laimu dahin local school board-ah pawh conservative te awm se duhtu a ni bawk. Academic doctrine pakhat US history opressions lens hmanga thlirna ‘Critical Race Theory’ zirtir khap duhtu a ni bawk.
Nautihtlak kalpui a duhlohna te chuan evangelicals te thlawp a hlawh hle tura ngaih a ni a, chu tak chu a chhiatphahna a ni thei bawka ngaih a ni. Pro-business Republicans te pawhin Disney nena an intihbuaina chu an sawisel bawk a, party kal dana regulation lama inrawlh ngai loh an thlan thin a bawhchhia an ti bawk.
Trump khing turin DeSantis penchhuak ta
![](https://theaizawlpost.org/wp-content/uploads/tap_logo-min-large.jpg)