Trump leh Putin inbe turin ruahmanna awm lo – White House

Trump leh Putin inbe turin ruahmanna awm lo – White House
US President Donald Trump-a’n ‘tun hnai maia’ Russian hruaitu, Vladimir Putin-a kawm turin ‘ruahmanna a awm lo’ niin White House thuneituin a sawi.
Ningani kal ta khan Trump-a hian Russian president nen hian chawlhkar hnih lo awm leh tur chhungin Budapest-ah Ukraine-a indona sawi dun turin an inhmu dawn niin a lo sawi tawh.
Hruaitu pahnihte inbiakna tur inbuatsaih nan hian US Secretary of State Marco Rubio leh Russian Defence Minister Sergei Lavrov-a pawh tun kara inhmu tura sawi lawk a ni a; mahse, White House chuan hruaitu pahnihte hi ‘hlawk takin’ an inbe tawh a, inkawm kher ‘a tul tawh lo’ niin a sawi.
White House hian engvanga inbiak rih loh tur nge tih engmah a sawi chiang lo.
Trump-a hian Budapest-a Putin-a nena inbiak an tum hi phone-ah an sawi dun a, a tukah White House-ah Ukraine President Volodymyr Zelensky nen an inbe zui.
Zelensky-a nena an inbia hi ‘thil hlawk tak an sawi lo’ nia sawi a awm a, Trump-a hian Ukraine khawchhak lam ram zau tak chu Russia nena an inrem theih nan pe mai turin a ti nia sawi a ni.
Hetih mek lai hian Thawhtanni khan Trump-a hian Kyiv leh European hruaituten tuna an indo nasatna laia inkahhai puan an rawt erawh tha a tih thu a sawi leh.
Moscow-in a duh ber chu ‘muanna daih rei, rintlak’ a nih thu Thawhlehni khan Lavrov-a chuan a sawi a, ramri hrula inkah chawlh chu inkahhai lailawk chauh a nih thu a sawi.
‘Buaina awm chhan ber’ chin fel chu a tul tih Lavrov-a hian a sawi a. Hei hi Kremlin-in Donas ram bial pum Russian thuneihna kuta dah leh heng lai atanga Ukraine sipaite hnuhkir a ni a, Kyiv leh an thawhpui European-ten an duh lo thung.
Zelensky-a chuan ramri chu ‘inpalai bul tanna’ a nih thu sawiin Russia hian ‘palai hmanga inbiakna ang chi chu a hnar zel’ niin a sawi.
Moscow-in inremna tura rilru a pek theihna tur chuan Ukraine hnena hmun hla kap thei ralthuam hlan chauh a nih thu a sawi bawk.
Ningani kal taa ruahman lawk lem lova Trump-a’n Putin-a a be thut hi Ukraine-in Russia ram ril zawk a kah theihna tura hmun hla kap thei Tomahawk missile pe tura a inbuatsaih nia hriat laiin a ni.
Zelensky-a hian Tomahawk an neih chuan Russia chu inbe turin a ko eih thei dawn niin a sawi a. Missile inpek chu ‘palai hna thawh nana inhlanna’ tiin a sawi bawk.