Mizoram Rural Bank Pro Volleyball League hmawrbawk a hnai tawh a, Mizo player zingah Khawbel captain Johan Vanneihsanga’n point hmu hem berin a thawh hlawk ber bawk.
Nilaini zan khan Khawbelin set thum set khata Anastasia Electric Veng hnehin a vawi khat nan Mizoram volleyball inelna sang berah final an lut a, inrinni zanah Hunthar nen champion inchuhin LPS Arena, Falkland-ah hmawr an bawk dawn.
Final an luh thlengin Johan-a’n vawi sarih khelin point 126 a hmu a, 60 hloh tel mah se team-in point 66 an hlawkpui phak. 2024 Mizo Best Player Fabian Lallunghnema’n championship kal mekah tum sarih a khelh atangin point 98 a hmu ve thung a, 37 hlohin team-in point 61 an hlep thei a, Johan-a dawtah Mizo player zinga thawh hlawk ber a ni mek.
Rin hlawh zingah Hunthar captain Remsangzuala (Lalmama) a tel a, an thlang a nih chuan Pro Volleyball setter zinga he chawimawina dawng hmasa ber a ni ang. Mi dang tan ball siamsaktu ni mah se Lalmama hian point 28 hmu tawhin point kua a hloh a, Johan-a leh Fabian-a nen vawi khat theuh Kuriz Player of the Match-a thlan an ni bawk.
Tun tumah hian D3 Business Enterprise chuan Haier home appliances hmingin Pro Volleyball mi mal chawimawina zawng zawng an tumsak vek a. Mi mal chawimawina ngaihhlut hlawh Mizo Best Player hnenah memento bakah Air Fryer an pe dawn a, ni thei tura rin kaiten inkhel pawimawh tak hmachhawn tur an la nei a, final-a thil thlengin a hril thei viau dawn a ni.
Team pasarih inel zingah Thutak Nunpuitu Team tih loh a dang zawngin team tichak turin hnam dang player tha an la lut vek a. Huntharin Tamil Nadu atanga an lak luh Suryansh Tomar chuan vawi sarih a khelh atangin point 198 hmuin 79 a hloh a, point hmu tam ber leh hlep nei hnem ber a nih rualin, ani aia vawi khata khel tlem Sihphir rinrawl Niyas Abdul Salam chuan point 188 hmuin 84 a hloh a, point 104 hlep neiin point 15 chiahin Suryansh a tluk lo.
Khawbelin league khelh hnih an la nei tihin Tamil Nadu atangin Angamuthu Ramaswamy an la lut. Final an luh theihna chhan ber niin vawi thum a khelh tawhah feet 6 leh inchi 9-a sang hi a filawr viau a, point 40 chuang hmu ziahin a vaiin point 136 a thawk chhuak tawh a, 39 hlohin team-in point 96 an hlep thei a ni.
Lehlam vuak dan kawngah Mizo player-ten hma an sawn tih a lang a, vawi li Best Blocker ni zawn lai Zosangzuala (Mama) chuan Anastasia tan vawi sarih a khelhah point 81 hmuin 21 a hloh a, blocker zinga point hmu tam leh hlep nei hnem a ni.
Chutih lain TNT rinrawl Lalsaitluanga’n tum ruk a khelh atangin point 68 hmuin 13 chiah a hloh a, vawi khata khel tlem chungin Mama aiin point nga chauhin hlep a nei tlem.
A lai atanga lehlam vuak dang thin zingah Vanlaltanpuia (Chhinga Veng), Hunthar player pahnih Wilson Lalremruata leh Lalbiakmawia Khiangte te pawhin team tan hmun pawimawh tak an luah bawk.
Haier Mizo Best Player bakah Haier Best Spiker, Best Blocker, Best Setter, Best Receiver leh Best Coach thlan a ni dawn a, hmeichhe lamah mi mal chawimawina chi li sem chhuah a ni bawk ang.
Tu nge Haier Mizo best player ni dawn?
