Mizoram chhulchhuak “Mizoram Cooperative Apex Bank Ltd” hotute chuan tun hnai khan thuthar thehdarhtute hnenah an bank dinhmun sawiin, kum 2023-24 chhunga Credit Deposit Ratio (CDR) chu 77.75% a nih thu leh, Mizorama bank awm zinga CDR tha ber a nih thu an sawi a. Apex Bank hian deposit an dawn atanga za zela 77.75 chu loan atan an pechhuak leh a, mipui tan an luangchhuak nasa hle tihna a ni.
India rama sum bawm lian ber RBI-in a phut dan chuan, CDR hi a lo berah bank-te hian 60% tal an tlin tur a ni, tih a ni a; mahse, hei hi bank tam takin an tlin thei lo. Chumi awmzia chu, mipui atanga pawisa deposit an hmuh zawng zawng zatve hmawk emaw, a aia tam zawk emaw chu mipui tana thehchhuak lovin thildangah sum peipun nan CDR hniamte chuan an hmang ta thin tihna a ni a, mipui tan an luangchhuak mang lo tihna a ni.
Mizoramah hian ram pum huap bank a lo lut nasa ta hle a, mipui pawhin an bawh viau a, mahse mipui tana luangchhuak nasa chu kan tualchher bank (Apex Bank, MRB etc) te hi an ni deuh zel awm e. Bank dangte hi hnualsuat tur emaw, thinhrik tur emaw tihna ni lovin, mahni state chhunga piang leh sei lian, state mipuite tana luangchhuak nasa, state danga sum luanchhuahtir ve lova, mahni state chhunga mipui hman tangkai theih tura vir kual tir ngar ngartu tualchher bank te hi kan duhsak thiam poh leh keimahni tana tha tur a ni tih hi kan hriatthiam a hun ve ta hle a ni.
Hetih rual hian, kan tualchher bank-te pawh hian, tan an la mek chungin, mipui dawr nuam nih tum sela, customer care lamah tan la sauh sauh sela, bank dawrna hmanrua changkang leh awlsam, mipui tana zangkhai leh awlsam tur seng lut deuh deuh se, thingtlang khaw kilkhawr zawkten an chhawr tangkai lehzual theih turin ruahmanna siam thin se a duhawm hle a ni.
Mipui lam pawhin tualchhung bank pawimawhna leh hlutna hi kan hriatthiam a pawimawh a, tualchhung bank kan dawr hian, a ram leilung fate kan inpeizawn tel tel a ni tih hi kan hriat a pawimawh hle a ni.
Tual chher Bank hlut thiam ila
