Tualchhungmite silk thuam siam pho
Mizoram silk tihhmasawnna, thiamthil pholanna leh chawilarna “Tlangro : The Mizoram Silk Runway” chu Thawhlehni zan khan Aizawlah neih a ni a. Sawrkar laipui Ministry of Textiles-a National Handloom Development Corporation (NHDC) development commissioner (Handlooms) leh Mizoram Sericulture Department tangdun buatsaih a ni.
Hmanpuitu larsap Gen. Vijay Kumar Singh (Retd) chuan, Mizoram chu silk chi li – mulberry, eri, muga leh oak tasar thar chhuahna state a ni a, silk hrang hrang thar tamna khawpui ni turin theihna a nei a, tan erawh lak nasat a tul tih a sawi. Khawvel pumah natural fibre silk mamawhna a san zel avangin Mizoram Eri silk chu khawvel market-a hralh tla tur a ni tih a sawi bawk.
Sericulture chu thingtlang hmasawnna leh hmeichhiate dawmkanna atana inmil, hna dang nena thawh kawp theih, sum lakluhna hnar tha a ni, tiin, a chaw tur thlai chin uar, Mizoram pual muga brand siama chawilar, pangang khawi inzirtirna changtlung zawk neih, mawihnai zawka chhuah thei tura sawngbawl, khualhipna atan hman thiam, digital platform leh e-commerce nen thlun zawm, designer leh fashion industry-te nena thawhho bakah sawrkar puihna hmangin Muga silk chu chawilar theih a ni tih a sawi a ni.
Silk Runway-ah hian larsap nupui Bharti Singh, chief secretary Khilli Ram Meena leh Central Silk Board hotu Dr Naresh Babu N te pawhin an telpui a. Fashion designer Tluangpuii Hmar leh Violeta by Sangzuali kut chhuak silk thuam phochhuah a ni.
Tualchhungmite silk thuam siam pho
