Tualthihna vangin ramri-ah dang
Tunhnaia Siaha district chhunga Myanmar lam mite inhnamhnawihna nia hriat tualthihna thlengah ramri hnaih lama awm Mara Thalai Pawl Sub Hqrs. Chhaolo (Chhuarlung) chuan he thil thleng an dem zia lantir nan an hnuaia khuate leh Myanmar inpawhna kawng chu thu leh awm hma an khar.
Tarlan tawh angin, March 19 khan Siaha ami pahnih chu Myanmar-a hel pawl nena inkaihhnawihna nei nia hriat mi pahnihin hruaichhuakin lirthei pakhat an hire hmangin Myanmar lamah an luhpui a, an chin hriat zui a ni lo. March 22 zan khan an ruang chhar a ni.
He thil thlengah hian inpuhmawhna a awm a, pawikhawihtua puhte hi Myanmar sawrkar laka zalenna suala bei mek CDF-Mindat lam mi ni awma sawi a awm a. CDF-Mindat hian thuchhuah siamin, pawikhawihnaa inhnamhnawih ber nia sawi hi an mi leh sa niloin, ralthuam tawlh lam buaipui thin niin an sawi a ni.
He thil thleng an duh loh zia lantirna’n MTP Sub Hqrs. Chhaolo chuan an huamchhung khua – Iana, Lobo, No-aohtla leh Siata ah Myanmar nena inkalpawhna kawng chu thu leh awm hma March 29 atanga khar a ni tih an puang a ni.
He tualthihnaa a lirthei an hire sak, ama nunna hloh phah leh tun thlenga a lirthei (Tata ACE) chin hriat zui loh B Lalthafamkima chunga thil thleng an duh loh zia lantir nan Driver Association Sub Hqrs. Tipa (Tuipang) pawhin Myanmar lam atangin lirthei reng reng an huamchhungah luhtir rih lo tur leh lirthei neituten Myanmar lam mi hire-in Myanmar chhungah tumah lut rih lo turin an inhriattir a. Duty post siama duty turin an inti bawk.
Mizoram Commercial Vehicle Union Siaha District pawhin he tualthihnaa nunna chan zingah an member B Lalthafamkima a tel ve avang leh, tun thlenga a lirthei hi hmuhlet ala ni loh avanga an lungawiloh lantirna’n Myanmar nena inkalpawhna zawng zawng danchah vek turin an ti a ni.
Tualthihna vangin ramri-ah dang
![](https://theaizawlpost.org/wp-content/uploads/tap_logo-min-large.jpg)