Tuchel rawih mak ti em emtu Rooney
England captain hlui leh engemaw laia Three Lions tana goal khung hnem ber pawh lo ni tawh Wayne Rooney khan England head coach thar atan English coach ngei an thlanchhuah a lo beisei em em laia Thomas Tuchel an senglut ta mai mak a tih thu leh a barakhaih thu a sawichhuak.
Tarlan tawh angin, German pachal Tuchel hian Gareth Southgate-a kalsan hmunruak chu kumthar January ni 1 atangin a luah tan dawn a, non-British coach zingah kum 2012-a kalbo Italian coach Fabio Capello hnu lama England men’s team manager ni leh hmasaber tur a ni.
Capello leh English coach ni lo dang Sven-Goran Eriksson hnuaia lo khel ve ve tawh Manchester Unites forward hlui Rooney hian Football Association chu English coach ngei ruai tura a lo ngaih ngheh hmiah thu sawi chungin German kum 51 mi an ruai daih chu a hriatthiam loh thu a sawi.
Football khelh a chawlhsan hnua Plymouth Argyle boss ni mek Rooney chuan, “Tuchel hi coach tha lutuk a nih tho chu ka ring a, mahse, FA-in an ruai hi mak ka ti.
“Coach la naupang zawkte tan FA hian platform an siamsak turah ka ngai a, tualchhung mite thlang loa ramdang coach an ruai hi mak ka ti tawp thei lo.
“Engpawhnisela, thutlukna an siam tawh a, Tuchel pawh ka duhsakna sangber ka hlan a, kan tan hna tha tak a thawh ngei pawh ka beisei,” a ti.
Head coach nghet atan FA lamin Tuchel be fel tawh mah se nikum European Under-21 Championship-a England champion-puitu interim boss Lee Carsley chuan thla thar Nations League match-a Greece leh Republic of Ireland an sut hunah team a la enkawl chhunzawm rih dawn a ni.
Football Association chuan kum 2012 khan Burton-upon-Trent bula St George’s Park-ah national football centre dinin, football bupui an dinchhuah chhan ber chu player-te mai bakah tualchhung coach-te tana kawngsialna hmanrua atana an tih a ni a; St George’s Park-a an insuanluh hnu kum 2017 khan England chu under-20 leh under-17 World Cup-ah an champion ve ve a, European Championships lamah pawh an champion teuh hle a nih kha.
Coaching lamah erawh an ram senior team enkawl tura rin ngam tak tak tur an la chhawmchhuak chiah lo niin a lang a, Southgate thlaktu atan pawh German coach lam an hawi leh ta rih a, football a chawlhsan hnua coaching luhchilh Rooney ngaihdan a ni lo!
November 2018-a United States a hmachhawn kha England tana Rooney inkhelh tawpna niin, kum 2003 leh 2018 inkar khan ram tan game 120 a khelhah goal 53 a tilut tling a, kha kha England record a ni reng a, nikum March thla khan he record hi Harry Kane chuan a rawn khum ta a nih kha.
Rooney hian World Cup leh European Championship vawithum ve ve khelin, tournament lian parukah hian England chu knockout stage vawinga a thlenpui a; manager nghet paruk a hrawn hman zingah a chipui pali Southgate, Steve McClaren, Roy Hodgson leh Sam Allardyce an tel.
Tuchel rawih mak ti em emtu Rooney
