India hmarchhaka tui hnianghnar leh tuihna tha a awm zel theih nan Indian Chamber of Commerce bultumin Zirtawpni khan Guwahati-ah ‘North-East Water Conclave’ neih a ni a. Mizoram PHE minister Prof. Lalnilawma pawh khualzahawm atan sawm niin, a tel.
Minister chuan Mizoramah thal laiin tui hna kangchat a tam thin avangin mipuiin harsatna an tawh phah tih a sawi a. Tui vang a harstana leh sik leh sa inthlak danglam nasa lutuk tih ziaawmnan tui hna leh ramngaw humhalh kawngah tanrual a pawimawh tih a sawi.
“Ramriin a then ve loh, leilung hausakna intawm pawimawh tak, boruak thianghlim leh lui luangte tha taka enkawl chu mitin mawhphurhna a ni a. Hmarchhak state-ten hmasawnna kawng chak taka a zawh chhunzawm zel theih nan tui thianghlim hnianghnar leh boruak thianghlim awm turin ramngaw leh tui hna humhalh kawngah thawhhona tha siam ang u,” a ti.
Assam & Meghalaya Indian Chamber of Commerce chairman Sarat Kumar Jain chuan tunhma atanga tui hnar tha nghahchhan a hmasawnna din a nih tawh angin, tun thlengin tui hi mihring dam khawchhuahna leh hmasawnna innghahna pawimawh a la nih ren tih a sawi a. Ram hrisel siamna atan tui thianghlim hnianghnar nei tura thawhho a pawimawh tih a sawi a ni.
Assam Minister for Housing, Urban Affairs & Irrigation Ashok Singhal pawhin thu a sawi a. Hmarchhak state danga PHE minister leh department hotute chu he Conclave-ah hian telin, Mizoram PHE engineer in chief Rothanga’n tui lama Mizoram dinhmun leh harsatna chungchangah powerpoint presentation a pe a ni.
Tui hnianghnar leh tui hna tha neihna tur sawikhawm
![](https://theaizawlpost.org/wp-content/uploads/tap_logo-min-large.jpg)