Vawiin March ni 22, World Water Day-ah hian tui leh tuihna pawimawhna kan infah leh chiam ngeiin a rinawm.
Mizoramah tuihna a kiam chak avangin harsatna kan tawk chho mek a. Ramngaw atanga tuihna a lo insiam dan te hi chu kan hre bel viau tawh, kan inhrilh ngun em em; chuti chung chuan tuihna insiamna hnar ber ramngaw erawh kan tichereu chak em em thung a. Tuihna a han tlem zual deuh a, lui hnar lamah leh lui bul hnaiah thing phun kan han intihhmuh leh ngawt a. Thing tiak pakhat puitling tura kum tam tak a duhzia kan hre khiu khiau a, mahse awlsam takin kum tin thing puitling sa kan vat thlu chur chur a, kan hal kang dur dur ta mai thin a. Chuti chung chuan “tuihna insiamna ber ramngaw i humhalh ang u” kan la ti leh ang lawi a. Kan khawsak dan hi a herh chingchivet (weird) tlat mai a ni ber.
India rama ramngawin a khuh zau ber state kan ni a, chutih laiin ramngaw tichereu chak ber kan ni nghal bawk a. Hei hian a hrin chhuah leh tur nia lang ta chu “tuihna kang chak berna state Mizoram” tih a ni leh maiin a rinawm.
Mizoram Statistical Handbook 2022-ah chuan kum tina ruahtui a tlakhniam chakzia a hmuh theih a. Kum 2017-a ruahtui tla chu 2712mm a ni a, hemi hnu lamah hian 2000mm a kai ta lo reng reng a, 2022-ah phei chuan 1650mm a ni ta duai mai a ni.
State len dan nena khaikhina Ramngaw ngah ber, mahse tichereu chak ber kan nihna hian nghawng tha lo tak tak pahnih a hring chhuak nghal a, chu chu- ruahtui a tlak tlem phah a, ruahtui khawlkhawmtu ramngaw chereu chak avangin tuihna a kiam phah bawk.
Statistical data hi, hriatna tizautu atana hmang satliah mai lova, kan dinhmun tehna leh, chumi atanga hma lakna leh ruahmanna siamna atana kan hman tangkai a pawimawh hle. Tuna kan data atang hian, ramngaw tichereu chak zawnga sawhthing chinna leh buh chinna atana ramngaw kan vat eng duai duai mai hi, ruahtui tlem chhan leh tuihna kangchat chak chhan a ni tih a lang a. He eizawnna thlakna tur leilet siam theihna ram awl zau tak kan neih mek hi hman tangkai a hun takzet tawh a. Tui harsatna sukiang tura leilet ‘mega project’ kan kalpui loh chuan, Mizoram hi ‘tlang ram thlaler’ah kan la inchhuah mai ang tih hlauhawm tak a ni tawh.
Tui kan ngaipawimawh tawk em?
![](https://theaizawlpost.org/wp-content/uploads/tap_logo-min-large.jpg)