Pi leh pute atanga tuikang nghah thin hun hrehawm leh harsatna chu hmasawnna in a her liampui rualin, kan chenna leilung leh boruakin chhiat lam a pan a, tuihna a tlem tial tial a. Ramngaw leh tuihna siam thar leh turin khawvel ram lian leh India sawrkar ngei pawhin nasa takin hma a la tih minister hian sawiin, “Thing leh mau tichereu lo zawnga theihtawp chhhuah hi kan tih makmawh a ni a, ruahtui dawn khawl nachang hriat a pawimawh a, tui lakna leh dawnkhawlna atana sawrkar hmalakna mipuiin neitu rilru pua duat taka enkawl thiam a pawimawh a ni,” a ti.
Tui kan hnianghnar chuan faina leh thianghlimna kawngah te, hriselna kawngah te nasa takin hma kan sawn thei dawn tih Lalruatkima hian a sawi a. Sawrkarin mipui hnena tui thianghlim pek chu a mawhphurhna a nih rualin, tui lakna hmunhma leh hmanruate engtik lai pawhin sawrkarin a vil reng thei loa, a khaw neitu mipuiin hemi kawngah hian mawh an phur a ni, tiin, Khanpui leh Lailak khaw mipui chu neitu rilru pu chunga RD hmalakna vil turin a chah.
He project hi kum 2017 ah NABARD ah thehluh a ni a, kum thum hnu, 2020 khan NABARD in a pawmpui. 2020 February 10-ah hna tan a ni a, 2021 October 16 a zawh a ni. Tui lakna tur ngawr ngawr tinzawna duan ni loin, Chalfilh tlang leh a chhehvel ramngaw chereu zel tur veng a, tuihna tuaithar leh tihpun lehna atana ruahman a ni.
Chalfilh catchment area-a khaw pathum – Hmunnghak, Lailak leh Khanpui chawmna turin Chalfilh tlang sang atangin GI pipe hmanga tui lak a ni a. Tui litre 6000 dawng theuh zonal tank 10 – Khanpuiah 5, Lailakah 3 leh Hmunnghakah 2 dah a ni a. Tui khawlna tur zem lian litre nuai 3 dawng theuh – Khanpuiah 2, Lailak leh Hmunnghakah 1 ve ve bakah Lailakah litre nuai 2 dawng 1 dah a ni.