Tui lian leh lei min tuar state panga tan Rs. vbc 1,066.80 pe

Sorkar laipui chuan tun hnaia fur ruahtui tla nasa avanga tui lian leh chhiatna dang tuar nasa state-te tan Rs. vaibelchhe 1,066.80 pek chhuah tur a pawm.
Heng pawisate hi Assam, Manipur, Meghalaya, Mizoram, Kerala leh Uttarakhand-a tui lian leh lei min nasa avanga pek chhuah tur a ni.
Tui lian tuar state paruk zingah Assam chuan Rs. vaibelchhe 375.60-in an dawng ang a. Manipur-in Rs. vaibelchhe 29.20, Meghalaya-in Rs. vaibelchhe 30.40, Mizoramin Rs. vaibelchhe 22.80, Kerala-in Rs. vaibelchhe 153.20 leh Uttarakhand-in Rs. vaibelchhe 455.60 an dawng dawn a ni.
“Heng state-te hian kumin furah hian ruah sur nasa tak, tui lian leh lei min nasa tak an tuar hlawm a ni,” tiin union home ministry chuan a tar lang.
Sorkar laipuiin a state-te tan hna a thawk tih Union Home Minister Amit Shah chuan X-ah tar langin, “Modi-a sorkar hi a state-ten eng dinhmun pawh an tawhin an tan a ding zel a ni,” a ti.
“Vawiin hian sorkar laipui chuan Assam, Manipur, Meghalaya, Mizoram, Kerala leh Uttarakhand-a tui lian leh lei min tuarte tan Rs. vaibelchhe 1,066.80 a pek chhuahna tur a pawm a. SDRF/NDRF fund hi kuminah state 19-ah Rs. vaibelchhe 8,000 chuang pek chhuah a ni tawh a. Suma inpuihna bakah hian inkalpawhna thilah te, NDRF, army leh air force tira inpuihnaah nasa taka thawh leh ngaih pawimawh a ni,” tiin Shah hian a sawi.
Union home ministry-in a chhinchhiah dan chuan sorkar laipui hian kuminah State Disaster Response Fund (SDRF) atangin state 14-ah Rs. vaibelchhe 6,166.00 pek chhuah niin National Disaster Response Fund (NDRF) atangin state 12-ah Rs. vaibelchhe 1,988.91 pek a ni tawh bawk.
Heng bakah hian State Disaster Mitigation Fund (SDMF) chu state pangaah Rs. vaibelchhe 726.20 pek chhuah niin state pahnihah National Disaster Mitigation Fund (NDMF) Rs. vaibelchhe 17.55 pek chhuah a ni bawk.
“Sorkar laipui hian mi puih leh chhawmdawlna atan NDRF team, army team leh air force te chu tui lian, lei min leh ruah bawhawk sur avanga buai state-ah a tir thin bawk a. Fur thleng mekah hian NDRF team 104 chu state leh union territory 21-ah chhanchhuah leh chhawmdawl hna thawk tura tirh chhuah an ni tawh,” tiin home ministry chuan a sawi.