Tui ngaih pawimawhna…

Mizoram Pollution Control Board (MPCB) chuan nimin khan Govt. KM Higher Secondary School-a science zirlai thlanchhuah bikte tan ‘Water Quality Assessment’ training a buatsaih a. Tuikual luiah tui sample lakpui an ni a, laboratory-ah a endik dan an zir dawn a ni. Training hi a remchan dan angin school dangte tan pawh buatsaih chhoh zel tur a ni.
Tui thianghlim dan endik thiam hi a pawimawh a, tuna zirlaite hian tui thianghlim leh thianghlim loh endik dan an hriat chuan tui ngaih pawimawhna pawh an nei zui ngeiin a rinawm a, chu chuan hma lam hunah awmzia thui tak a nei ngeiin a rinawm bawk.
Tui thianghlim leh thianghlim loh endik thiam a pawimawh tluk bawk hian, a endik tur tui kan neih that hi a pawimawh bawk.
Tunhma kha chuan Mizoram lui tuite hi fur laiin a lian a, a nu bawk a; mahse, tuilian nu pangngai a ni a, fur ruahtui a tlak loh hunah a fim leh mai a, in atan a la thianghlim a, motor te pawhin chawi a ni thin a, PHE te pawhin public-ah an sem thin a nih kha. Tunah chuan lui tui hi bawlhhlawh hlirin a khat tawh a, thlitfim hle loh chuan hmantlak pawh a ni ta lo.
Mizorama kan lui tuite hi a kang chak a, a bawlhhlawh chak bawk a; a nihna takah chuan hnawm tinreng paih nan ber kan luite hi kan hmang ta mai emaw tihturin luiah plastic leh sarang bawlhhlawh chi hrang hrang a khat tlat a ni tawh mai a. Heng kan lui tuite hi a thianghlim nge thianghlim lo tih endik dan kan inzirtir ang bawk hian, tuihna tihpun dan tur te, tui tihthianghlim dan turte hi zirlaite hi fah mawlh mawlh a pawimawh takzet tawh. A chhan chu, nakin lawka ram inrelbawlna hna chelh turte an ni a, tun atanga environment pawimawhna an hriat thuk a, an hriat chian a, hma lak dan tur an lo thiam hi a pawimawh em em a, puitlin hnu chauha awareness inpek tur emaw kan tih chuan a tlai tawh dawn a ni.
Khawvela mihring nunna atana hlu ber chu tui hi a ni, ti ila, kan tisual tam lo maithei. Hun rei tak tak chaw tel lova mihring a nun theih laiin, tui tel lo hi chuan rei a dam ve theih loh. Tun dinhmunah hi chuan, tualchhungah tui harsatna kan la chingfel thei a ni maithei, nakin lawkah chuan ram leh ram innghirnghona/indona lian tak chawkchhuak theitu chu tuia harsatna hi a ni dawn tih mithiamten an sawi hi a thlen dik a rinawm ta hle a ni.
Tui thianghlim leh thianghlim loh endik tur tui tam tawk kan neih reng theih nan tuihna tihpun a pawimawhzia hi thangthar mekte rilruah kan tuh ngheh hi a ngai ta hle a ni.