Aizawl khawpuiin tui harsatna a tawk mek a, tuna harsatna a tawh mek hi tui a len vang emaw khuarel chhiatna vang emaw ngawr ngawr a ni tawh lo – Tlawng tui a nu.
Remal cyclone leh a ruah kenin Mizoramah chhiatna a thlen a, Tlawng a len avangin tui lak hna pawh nasa takin a tibuai. Aizawl khawpui tui tlan Tlawng lui a lian a, tui lakna khawl a tichhe nasa. Chu chu tui nut vanga harsatnain a zui a, chu harsatna chu tuna Aizawl mipuite harsatna thlen mektu a ni.
PHE department hotute chuan tui lakna khawl chhiate an siam mek a, tihfai ngaite pawh an tifai nual tawh tih an sawi a, an tui pump theih zat pawh a pung a, mahse tui a nut em avangin harsatna an tawk mek tih an sawi.
Tlawng atanga tui lakna Greater Aizawl Water Supply Scheme (GAWSS) Phase I leh II te tuilianin nasa takin a tibuai a, mahse siam ngai engemaw zat an siam tawh. Tui pawh tam tham an pump thei tawh a, mahse tui a nut em avangin a tihfim a hautak bakah hun a duh reng.
PHE department hotute sawi danin, June ni 3 atang khan Phase II-ah chuan khawl zawng zawng an tinung thei tawh a, tui pawh ni khatah litre maktaduai 17 vel an pump thei tawh. Mahse tui hi a nu em em a, tui fim lam tehna NTU ( Nephelometric Turbidity Unit) 5 hnuai a nihin sem tlak a ni an tih laiin NTU 800 te, NTU 900 te a la ni. A hma phei chuan NTU 1000 chuang te a ni.
NTU 5 hnuaia dah turin an tifim thin a, NTU 800 te, NTU 900 te a nih avangin a tihfim a hautak bakah hun a duh rei. Tunah rih chuan a tihfim hna hi hna hautak a tling.
PHE department hotute chuan Remal cyclone-in a tihbuai hma pawhin tui nu hi harsatna a tlin daih tawh thu an sawi a, a tihfim a hautak a ni mai lo a, an khawl a tibuai thin. Bawlhhlawh chi hrang hrang, polythene thlengin tuiin a hip a, chu chuan khawl a tibuai thin a, a siam a hautak si a, tui pump a tihautak thin tih an sawi.
Bawlhhlawh leh leivung paih vanga Tlawng hi nu a nih thu an sawi a, tuna tuilian vanga harsatna a thlen pawhin tui nu hi harsatna a tling zui a ni an ti.
Phase II lam chu tihfai ngaite an tifai tawh a, Phase I lam hi la tifai lo mah se diesel engine hmangin tui engemaw zat chu an pump thei tawh. Mahse diesel engine hi hman reng chi a ni lo.
‘Pump House leh a bul vela chirh leh khawl velte chu kan tifai tawh a. Phase II bikah chuan a tira kan buaina kha tuiin power line a tichhia kha a ni a, hei pawh kan siam tawh a,’ PHE department hotute chuan an ti a, electric motor pahnihin tui a chim tih an sawi a, pakhat chu company hnenah siam tura an thawn tur thu leh pakhat zawk chu hetah an siam mek thu te, hma an sawn a, mahse hun a la duh ang tih te an sawi bawk.
Tui nut vanga tui harsatna
