Aizawl mipuite tui tlan Tlawng lui a nut avangin tun hnaiah an pump thei lo a, tunah chuan a pump theih ta. Mahse a la nu hle.
May ni 31 atanga June ni 3 thleng khan PHE department-in tui hi an pump lo a, ni 4 atangin an pump ta. Tui a fim ta tihna a ni lo a, a zia ta deuh a, pump loh theih loh a nih avangin an pump tiin department hotute chuan an sawi.
Tui fim lam tehkhawng hi NTU (Nephelometric Turbidity unit) an ti a, NTU 5 hnuai lam hi mipui hnena sem tlakah ngaih a ni. A tehnaah hian NTU 1000 thleng a hmuh theih a, May 31 atanga June ni 3 thleng khan NTU 1000 chuang te a nih avangin pump chi-ah an ngai lo.
June ni 4-ah an pump tan a, NTU 700 te a la ni. NTU 500-ah, 400-ah te a tla a, a zia hret hret. June ni 5-ah khan pangngai takin an pump tawh a, ni 6-ah pawh tha takin an pump.
Tlawng tui lak hna hi Greater Aizawl Water Supply Scheme Phase I leh Phase II hnuaiah an thawk a, Phase II hnuaia chirh a tam em avangin tui a hip thei lo thin tih an sawi. Phase I-ah pawh chirh hi a tam a, nikum lawkah remal cyclone vanga harsatna a thlen lai khan an tifai a, tunah chirh a tam leh hle tawh tho tih an sawi bawk.
Tun hnaiah tui an pump thei lo ngun a; May ni 2 zana ruah surah khan tui a nut nghal avangin a tukah an pump thei lo nghal. April ni 17-20 chhung khan NTU 1000 chuang a ni fo a, an lo pump thei lo tawh bawk.
Hun pangngaiah chuan Tlawng lui hi NTU 100 vel a ni thin a, lui tuiah chuan NTU 100 te chu a fim an ti. NTU 5 hnuai lam nihtir tumin an tifim thin a, NTU 800 chung lam te hi chu tihfim a hautak bakah a pump pawh a hautak a, pump theih loh khawp a ni thin, PHE department hotute chuan an ti.
Tui hi pump thei tawh mah se a la ngaihthatthlak loh tih an sawi a, ni hnih khat pump loh hian tui mamawhna a lo sang hman a, a sem lamah harsatna a thleng nghal zel an ti. Tui nut dan en hian, a zia deuh tia pump an ni mai a, nu leh thut thei a ni an ti bawk.
Tui pump thei tawh, mahse a la nu
