Mizoram EIACP Hub, Mizoram Pollution Control Board (MPCB) chuan Mission LiFE programme hnuaiah Govt. KM Higher Secondary School-a science zirlai thlanchhuah bikte tan ni hnih awh tur ‘Water Quality Assessment’ training a buatsaih.
MPCB scientist ‘C’ Dr Lalramnghaki Pachuau chuan Mission LiFE hnuaia thupui pakhat “Save Water” chungchang a sawi a. Ram hrang hrangin tui lama harsatna kan tawh nasat zia leh tui renchem a tul zia sawiin, tui renchem nachang hre tur leh tuihna humhalh kawnga tan la thar turin a chah.
MPCB laboratory-ah Mizorama kan lui tui thenkhat leh tuihna engemawzat chu tehfung hrang hrang 30 chuang hmanga endik thin a ni, tiin, chu’ng endikna report chu Central Pollution Control Board-a thehluh thin a ni tih a sawi a ni.
MPCB senior scientific assistant Joseph Lalhmunliana chuan training kalpui dan tur, training chhunga tih tur hrang hrang leh tui sample endikna tur tehfung chungchang a hrilhfiah hnu ah, training-a telte hian environment humhim tur leh chumi atana nunphung thlak danglam ngai pawh thlak danglam turin Mission LiFE ‘thutiam’ an la a ni.
Programme hman zawh hian zirlaite hi Tuikual luiah tui sample lakpui an ni a, tui sample lak hi MPCB laboratory-ah endik dan tur hrang hrang zirtir an ni a, Ningani khan an nei zo a ni.
Mizoram EIACP Hub chuan hetiang training hi a remchan dan angin school dangte tan pawh buatsaih zel a tum a ni.
Tui renchem zirtir pahin tui quality teh dan zirpui
