Kawng a tlang tawh a, ni tin mamawh thilte pawh harsa tawh lo turah ngaih ni mah se thil a la pangngai thei tak tak lo; tuialhthei pawh mamawh khawp a la awm thei lo.
Tuialthei hi a thleng thin a, mahse a thlen apiangin intlar a la ngai ziah tiin a sawi theih ang. Diesel hi intlar a ngai lo deuh a, petrol chu intlar a ngai deuh zel.
Thla hmasa khan Vairengte leh Aizawl inkar kawng a chhiat avangin lirthei an tlan tha thei lo a, Mizoramin ni tin mamawh thil hrang hrangah harsatna a tawk hman. Lirthei an tlan tha ta deuh a, mahse tuialhthei leh thil dangah harsatna a la awm.
Kawng siam a nih avangin lirtheite dintir an han ni ren rawn a, September ni 21 tlai atangin lirthei hi tlantir an ni. Mahse lirtheite hian harsatna an la tawk reng.
Filling station lam chuan petrol la tura intlar a la ngaih zel thu leh diesel la tur pawhin intlar a ngai deuh zel tih te an sawi a, hei hi kawngah lirtheiin harsatna an tawh vang a nih thu an sawi.
An sawi danin, Inrinni-a Vairengte chhuahsantu tanker te’n Thawhlehni khan Aizawl an thleng chauh a, kawngah zan thum te an thang a ngai. Ni hnih vela thleng tur chuan vanneih a ngai. Aizawl atanga chhuakte an thang rei ve leh a, kal lam haw lamah an thang rei avangin lirthei pawh an indaih loh phah.
A phurtute an thang rei avang hian tuialhthei hi a thleng tam tawk thei lo a, hei vang hian Mizoramin harsatna a tawk mek tih chu an sawi dan a ni.
Buichali leh Sairang inkar kawng a chhiat em avanga hel an awm a, chuvang chuan Bualpui velah traffic a jam ve leh tih thu dawn a ni. Sethawn velah kawng a chhe hle a, a chhiat zualna lai ni lovah pawh a chhiat tho avangin lirthei te’n harsatna an tawk nasa tih thu dawn a ni.
Food, Civil Supplies & Consumer Affairs department hotute chuan tuialhthei hi a thlen mumal loh lai khan mamawhna a lo sang hman em a, a thleng hmasa a zo nghal zel lo thei lo ve bawk tih an sawi.
Tuialhthei la hnianghnar thei lo
