Tuichangral Championship nei tan Infiamna hi eizawnna tlak a ni ta – Chief minister

Tuichangral Championship nei tan
Infiamna hi eizawnna tlak a ni ta
– Chief minister
Tuichangral Championship 2025 chu Thawhlehni khan E. Lungdar Mini Sports Complex-ah neih tan a ni a. Khaw 17-a kalte inelna 15-ah an inel dawn a ni.
A hawngtu chief minister Lalduhoma chuan, infiamna tam tak chu eizawnna tlak a ni tawh a, bei tak tak tan chuan hlawhtlin theihna leh ram leh hnam chawimawina a ni, tiin, intihsiak tur zingah talent nei tha, tih tak taka beitu tam tak an awm a ring tih a sawi.
Sawrkarin naupang talent nei tha zawn chhuah a, training tha tak pe a, Olympic 2036-a India aiawh thei khawpa buatsaih a tum tih a sawi a. Kumin Tuichangral Championship pawh hi naupang talent zawnna atan sawrkarin a hmang dawn tih a sawi a ni.
“Kan thalai tam tak ruihhlo vangin an thi zawih zawih a, Tuichangral thalaite chu nun kawng dik lo lakah fihlim ula, ruihhlo tih ai chuan infiamna lamah hunawl hmang zawk ula, rilru leh taksa tan a that bakah ram tan a tha a ni,” Lalduhoma hian a ti.
Kum 1970 chho atanga kalpui tawh he intihsiakna hian ngaihhlut a hlawh tih chief minister hian a sawi a. Tuichangral Games tia hriat thin chu Zoram a deng chhuak tih a sawi. “Infiamna ngaina tak in nih avangin infiammi pawhin an chhawr a. Mizoramin Olympian pahnih chauh kan la nei a, chuta pakhat zawk chu E Lungdar chhuak, thalkahthiam C Lalremsanga a ni. Tunhnaiah professional footballer engemawzat in chher chhuak tawh bawk,” a ti.
Sports minister Lalnghinglova Hmar pawhin Tuichangral thalaite tana entawn tur, kum li chhunga E Lungdar atanga Barcelona Olympic-a India aiawha inlan phak, Mizo Olympian hmasa ber neitu an ni tih sawi nawnin, “He bialah hian talent a awm tih kan hria a, kan rawn zawng a ni. Tuichangral Games buaipuituten Mizoram sawrkar an sawm lut a ni loa, sawrkar hian he Games-a rawn tel ve hi kan rawn dil zawk a ni. Naupang talent nei tha kan rawn zawng a, nakumah pawh kan zawng leh ang,” a ti.
Tuichangral Games & Sports Association hnuaia khaw 33 awmah kuminah khaw 17 an inlan. Mipa leh hmeichhia – football, volleyball, badminton single leh double, TT single leh double a awm theuh a. Under-16 tan bik boxing, wrestling, weighlifting a awm bawk.