Tuihna Humhalh Dan

Former Legislators Association of Mizoram (FLAM) chuan tuihna kam zel tur ven theih nana dan siamthar chu a nihna ang taka hman a nih theih nan Mizoram mipui leh thuneitute theihtawp chhuah turin an ngen tih thu chanchinthar lamah hriat tur a awm a.
Tuihna humhalhna dan -The Mizoram (Protection of Rivers) Act 2023 hian tuihna humhalh a pawimawhzia a tarlang chiang hle a. He tuihna humhalhna dan hi mipui lam chuan chipchiarin kan hre ve vakin a rinawm loh a. Dan tha tak a ni ang tih chu a dan hming atang ringawt pawh hian a hriat theih mai awm e.
Tuihna humhalh dawn chuan tuihna lo insiam dan hi hriatchian phawt a ngai a. Mithiamten tuihna lo insiam dan an sawi zinga pawimawh ber leh langsar ber chu ‘Ramngaw’ hi a ni awm e.
Engtin nge ramngaw chu tuihna siamtu a nih, tih hi zawhna pawimawh tak a ni a. Ramngaw hian amah mai chuan tuihna a siam thei lo a, tuihna siam tur chuan tui a ngai a. Chu tui chu rei tak a awmna ngaiah a inkhawlkhawm thei tur a ni a. Chutianga inkhawlkhawm thei tur chuan a lo chelh khawmuangtu a awm a ngai a; chu chu ramngaw hi a ni ta a ni.
Ruah a lo sur a, thinghnahten ruahtui chu a lo dang tleu a, lei lamah ruahtui chu a tla a, chu chu lei chunga hnimhnah leh hnahthel lo inchhekkhawmte chuan an lo chelh khawmuang leh a, zawimuangin leiin a lo hip thei ta a. chu chu lei chhungrilah a lo inkhawlkhawm a, ruah a sur tawh loh hnuah lei atangin a lo put chhuak leh a, chu chu a infinkhawm a, lui lian tak a lo insiam ta a ni.
Thlaler, thing leh thinghnah emaw hnimhnah emaw awm lohnaaah chuan tui lo chelh khawtlaitu a awm ve loh avangin chak takin lei chungah tui a luang pur pur a, leiin a lo hip khawl ve hman lo a, chuvangin thlaler ram ro leh ram kawlhah chuan tui tling emaw, tuihna emaw a awm ve thei lo. Heta tang hian ramngaw pawimawhna chu kan hrechiang thei mai awm e.
‘Tuihna humhalhna dan’ ni lovin ‘tuihna humhalh dan’ tha ber chu ramngaw humhalh hi a ni. Keini chuan thingtlang loneih hmangin kum tin ramngaw kan hal kang dur dur a, hei hi a tihtawp dan kan zawn loh a, a thlakna tur kan ruahman lo a nih chuan, ‘Act’ tih vel ringawt hi chuan awmzia a nei thui tak tak dawn lo niin a lang.