Aizawl Dinthar Venga futsal ground tur laih mekah tui kawng sial mumal loh vangin ruahsurah tuihawk kawngboin chenna in engemawzat a nghawng phah tih ZPM Thalai chuan sawiin, ruahmanna fel siam turin thuneitute an phut tih an sawi
ZPM Thalai Hqrs. thuchhuak chuan, Dinthar Veng Vanapa Section-a futsal ground laih hna thawh mekah tui kawng sial mumal loh avangin veng mipuiin ruahsurah tuihawk kawngbo avanga harsatna tawkin, awm chen chena tui a tlin thin avangin an mangang hle a, kuminah he harsatna hi tum sarih tawk tawhin, nunna pawh an lo chan teuh tawh hle tih a sawi.
Tunhnai ruahsurah chhiatna thleng lehin, an in luah zui ngam tawh lo chhungkua pawh an awm a, tui kawng sial mumal loh avanga tuihawk luang hian a chhehvela chengte bungrua a tichhe nasa hle tih sawiin, ‘Futsal ground laihna leivung paih hian Tuikual lui a hnawh a, leivung paihna mumal lo avanga Zoram pumah kan lui leh kawrten harsatna an tawh mek lai leh, chu chu mipui leh mithiamte lu tihaitu a nih lai a, Aizawl khawpuiah ngei mumal lo taka leivung paih a ni hi kan ngai thutak hle a, hmasawnna hnathawh hian a ram chhunga cheng mihring leh nungchate chungah harsatna a thlen chuan a hlut tur angin a hlu zo loa, mumal taka leivung paihna ruahman turin thuneitute kan phut a ni,’ a ti.
Leivung paihna mumal loh avanga tuilian harsatna tawk chhungkaw hnih hnenah tanpuina sumfai an hlan tih ZPM Thalai hian an sawi bawk.
Tuikawng sial loh vangin chenna in in a tuar – ZPMY
