Megawatt 132 thar thei Tuivai Hydel Project detail project report peihfel tawh chu hna bultanna atan sum dah a ni dawn a. Mipui leh sawrkar hlawkna tur a nih phawt chuan corporation anga awm an hnial lo tih Power & Electricity department chuan an sawi bawk.
Union Power minister Manoharlal-a’n kumin May 29-a Mizoram a rawn tlawh tuma chief minister Pu Lalduhoma nena thu an dah bawhzui dan relin Zirtawpni khan Power & Electricity minister F Rodingliana kaihhruaiin Finance leh Planning department hotute nen P&E department hotute an thukhawm.
Tuivai Hydel Project, Tuichang Pump Storage Project leh pump storage project dang siamna tur bakah corporation-a P&E department let tura hmalakna kal mek an sawiho a. Power-a intodelh tura sawrkar hmalak mekna leh sum ruahman dan tur sawiin, Mw 132 thar thei Tuivai Hydel Project DPR peihfel tawh chu hna bultanna atan sum engamawzat dah rel a ni.
Corporatization chungchanga hmalakna kal mek chu chak zawka bawhzui rel a ni a. Engineer -in- chief Ngursailova Sailo chuan, tun ang renga P&E department-in hma a sawn a, power siam chhuah belh kawnga hlawhtlinna hmuh a nih zel chuan, department-a thawktute pawhin mipui leh sawrkar hlawkna tur a nih phawt chuan, corporation anga awm an hnial lo tih a sawi. Chutihrualin, thawkleh khata tih hlawhtlin vut vut theih a ni lo tih sawiin, “Corporate lam hawiin kan inher rem zel a, department hi hlawm thum – transmission, distribution leh generation-a then hrang turin ‘unbundling’ tih mek a ni,” a ti.
Thutkhawmah hian adviser to chief minister (Finance) TBC Lalvenchhunga, P&E commissioner & secretary K Lalrinzuali, Finance commissioner Vanlaldina Fanai, Finance secretary Ramchuana leh Planning & PI principal adviser cum additional secretary Dr Lalrinchhana an tel a ni.
Tuivai HP bultanna atan sum dah P&E-in corporation-a awm hnial lo
