Turkey vur tlengna hmun khualbuk kangah mi 66 thi

Turkey vur tlengna hmun khualbuk kangah mi 66 thi
Turkey-a vur tlengna hmun lar tak khualbuka kangmei chhuakah mi 66 vel an thi a, mi thenkhat chu him tumin tukverh atangin an zuang chhuak hial.
Kangmei hi thinga sak in chhawng 12-a sang, Bolu-a Grand Kartal Hotel-ah an ram huna Nilaini zing dar 03:27 (India-a zing dar 05:57)-ah a chhuak a, chawlh hman hun lai, a lun lai tak niin mi 234 an thlen mek lai a ni.
A tirah thi hi 10 tia puan ni mah se a hnu darkar reilo te-ah Turkey-a interior ministry chuan an puang pui nghal vat a. Tukverha zuang chhuak zinga mi pahnih vel thi an awm bawk.
Darkar 12 zet thelh tuma beih a ni a, mi pali man nghal niin an zingah a neitu pawh a tel tih justice minister minister chuan a sawi.
Thi mi 66-te hi tute nge an nih finfiah vek an la ni lo va; mahse, an zinga pakhat chu kum 10 mi, Istanbul-a Fenerbahce Sports Club-a mi, Vedia Nil Apak leh a nu, Ferda an tel tih chu chian a ni tawh.
Club chuan he chanchin an hria hian a ‘tilungchhe’ hle tih Instagram-ah an tar lang.
Naupang thi zingah hian Alican Boduroğlu leh a nau, Elif Nas-i pawh an tel a, Istanbul-a sikul lut niin an nu, Ebru pawh a thi tel.
Khualbuka ei siam naupang tak, Eslem Uyanik, tual chhung sumdawng hriat hlawh fanu, Ceren Yaman Dogan leh a fanu kum 17 mi, Lalin te pawh an tel.
Hming tar chhuah tawh zingah hian Sozcu chanchinbua thu ziaktu, Nedim Turkmen, a nupui, Ayse Neva leh an fate pahnih, kum 18 leh 22 mite pawh an tel a. Ozyegin University Business School dean Prof Atakan Yalcin pawh a tel bawk.
Damdawi thiamten heart attack a neih avanga Bolu-a awm hahdam tura an tirh kum 24 mi, Dilara Ermanoglu leh a pa pawh an tel bawk.
Health Minister Kemal Memisoglu chuan hliam tuar mi 51 an awm tih an sawi a, mi pakhat intensive care-a dah ngai awmin mi 17 erawh chhuahtir lehnghal an ni tih a sawi.
“Hrehawm kan ti tak zet a ni,” tiin Interior Minister Ali Yerlikaya chuan a sawi.
Turkey-a video thehdarhah chuan mi thenkhat chu tukverha an zar linen hmangin in kang mek atanga uai chhuah an tum lai a lang.
Ski instructor Necmi Kepcetutan chuan kangmei a chhuah lai hian chhawng hnihnaah a awm a, ski room paltlanga tlan chhuakin mi dang a pui zui nghal tih BBC a hrilh.
Thil thleng hmutute chuan a kan lai hian a neitute chhungkua pawh an awm tih an sawi a. Kepcetutan-a pawhin an chhung zinga thenkhat chu pawnah a hmuh thu a sawi ve bawk.
Kangmei chhuah chhan hi hriat a la ni lo va; mahse, Bolu Governor Abdulaziz Aydin chuan an chhui tawh chinah chuan chhawng linaa thingpui dawr atanga chhuak nia an hriat thu a sawi a, a chhawng chung lam a man kai ta niin a sawi.
Aydin-a hian khualbuk awmna, Kartalkaya leh Bolu laili hi khaw vawt lutukin a hmeh avangin kang thelhtuten darkar khat chuang tlan nan hun an hman phah tih a sawi a. Emergency service chuan thawktu mi 267 an tirh thu an sawi.
Khualbuk hian kangmei a chhuah veleh khan an mikhualte zingah, naupang pawh telin, pindana la tang an awm em tih an dap nghal tih an sawi.
Kangmei chhuah palha tlan chhuahna tur pahnih an nei niin interior minister chuan sawiin thawktu pakhat chuan hemi atang hian mi 30-35 vel chhanchhuah an ni tih a sawi.
Justice Minister Yilmaz Tunc chuan chhuina thupek chhuah nghal a nih thu a sawi.
Khualbuk hi kum 2024 khan endik a ni a, tourism minister chuan tuna kangmei chhuak ang chi-ah himna lama buaina tur ang chi a awm lo tih a sawi.
Hetih rual hian Union of Chambers of Turkish Engineers and Architects (TMMOB) chuan inkaihhruaina an siamah automatic fire extinguisher system chu mamawh a nih thu an sawi.
“Khualbuk website-a thlalak dahah chuan automatic sprinkler system hmuh a ni a, kum 2008-a bun vek tawh tura tih kha bun a ni lo,” tiin union chuan thu an chhuah.
Inkaihhruaina dang zawm loh a awm em tih erawh an la hriat mai loh thu ans awi a; mahse, dam chhuakte ka atangin ‘hlauhawm a awm tih leh inralrinna dar khawnna hmanrua ang chi engmah thawk a awm lo va, tlanchhuahna tur kawng pawh a awm lo’ nia an hriat thu an sawi.
Bolu tlangram hi Istanbul leh an khawpui, Ankara atanga vur tleng miten an pan nasat tak niin km 170 vela hla a ni a. Khualbuk pawh hi chawlhkar hnih sikul chawlh chhungin a khat hneh thei hle.
Governor chuan kangmei hi khualbuk dangah a kang kai lo hlauh tih a sawi a; mahse, venthawn thilah a bul chiaha thlengte chu insasengtir an nih thu Turkish chanchinbumite hnenah a sawi.
Insasengtir mikhualte hi Bolu laili hnaih khualbuk dangah sawn an ni.