Turkiye ram kangin khawpui a hnaih, za tel an tlanchhia

Turkiye ram kangin khawpui a hnaih, za tel an tlanchhia
Turkiye-a an khawpui lian ber palina chhehvela chawlhkar eng emaw zat ram a kang tawh a, mi 1,700 chuangin an in chhuahsanin an tlanchhia a, kang thelhtu pakhat a thi tawh bawk.
An ram hmarthlang lama Bursa chhehvel tlangram ngaw kang hi Pathianni zan khan a inman kai chak zual a, khawpui chu meikhu avanga senin a tuam vek.
June thla tawp lam atang khan Turkiye-ah hian hmun hrang hrangah ram a kang nasa hle a, sorkar chuan khawthlang lama province pahnih, Izmir leh Bilecik chu Zirtawpni khan ‘disaster area’ tiin a puang.
Bursa governor pisa chuan Pathiannia thuchhuah a siamah mi 1,765 chu hmarchhak lama khuate panin an insaseng tih a sawi a, kang thelhtu 1,900 chuangin thelh tumin an bei mek bawk tih a sawi a. Thuneitute chuan chhanchhuah hna thawkin mi 500 an tul hle tih an sawi ve bawk.
Bursa leh an khawpui ber, Ankara inkalpawhna kawngpui chu a bul vel ram kan nasat avangin khar a ni.
Mayor Mustafa Bozbey-a chuan a hna a thawh a thawh mawlh mawlh laiin heart attack vangin kang thelhtu pakhat a thi tih a sawi a, kang hian khawpui chhehvel hectare 3,000-a zau a tuam tawh tih a sawi.
Forestry Minister Ibrahim Yumakli chuan kang thelhtuten an ram hmun 84-a ram kang thelh hna an thawk mek tih Inrinni khan a sawi bawk a. Hmarthlang chu dinhmun hlauhawm zuala ding nia sawiin Karabuk-ah Thawhlehni kal ta atang khan ram a kang tan tih a sawi.
Khaw lum lutuk, ro leh thli na tak tlehin ram kang hi a timan kai chak zual.
General Directorate of Meteorology chuan Turkiye-a khua a lum ber chu, 50.5°C chu chhim lama Sirnak province-ah Zirtawpni khan a thleng niin a sawi a. July-a a lum ber tum tawng thar hmun 132 dang an nei bawk tih a sawi.
Turkiye-ah hian a lum ber ni chu August 15, 2023 kha niin Saricakaya, Eskisehir-ah 49.5°C niin Anadolu news agency chuan a tar lang.
Nilainia khawthlang lam, Eskisehir-a chhanchhuah hna thawktu leh kang thelhtu mi 10 thi nen tun hnaiah ram kang avang hian mi 14 an thi tawh.
Justice Minister Yilmaz Tunc chuan Inrinni tlai tawh takah khan June 26 atangin province 33-a ram kang chhui tawhin dan anga an laka hma lak mi 97 an awm tawh tih a sawi.