Turks te chuan modern history-a inthlan pawimawh ber tia sawiah vote an thlak a, kum 20 chhung zet Recep Tayyip Erdogan an thuneihna a chan tawh hnuah thlak a nih dawn leh dawnloh tihchian a ni ang.
Erdogan-a elpui ber Kemal Kilicdaroglu chuan thlan tlin a nih chuan president Erdogan-an kum 2016-a amah paihthlak tum hlawhchham hnua thuneihna a inbel tam tak chu hlihthlak a nih tur thu a sawi.
Opposition te an tanrual avangin Kemal Kilicdaroglu chuan tlin theihna a nei tha hle nia ngaih a ni a. Tun tum Turkey inthlan aia inbeihna nasa a la awm lo tia sawi a ni bawk.
President Erdogan pawh a tang hle a, Inrinni kalta thleng khan Istanbul-a mosque a tawngtainaah te a la tel a, Pathiannia inthlanah candidate-te chuan chak zawk ni turin 50% vote tal an hmuh a ngai a, a nih loh chuan kar hnih hnuah inthlan thatna neih leh a ngai dawn a ni.
Turkey-ah hian vote nei maktaduai 64 lai an awm a, hun harsa tak an tawk mek a. Inflation sang tak 44% ni mekin tun hnaia lirnghing na tak a tawhah Turkey a province 11 te chuan an tuar na hle a, nunna chan pawh 50,000 chuang an awm a ni.
Ankaraa optician Burak Onder chuan tumah tarmit lei pawh an awm ngai tawh loh thu sawiin, “A tlawm pawh min dil chhin ngai lo, tumahin an lei pha lo a ni tawp mai,” tiin a sawi hial.
Inflation san chhan hi President Erdogan an orthodox economics hnawla khawvel ram dang tena interest rate an tihsan laia a tihhniam tlatin a hrin nia ngaih a ni a.
Dawr kai Rahime chuan ni tin a thil zawrhte a man tar te chu a thlak danglam a, a chhan ber pawh a man san chak lutuk vang a ni a. “Mite an lokal a, a man min zawt a, a san em avangin lei lovin an chhuak zel,” tiin a sawi.
Rahime fanu kum 19-a upa Sudenur chuan hma lam hunah hlauhthawn an neih thu sawiin sport science zir a chak chu a zir theih loh a hlauh thu a sawi a. Vote tum khat a thlakna tur niin amah mai bakah vote tum khat thlakna tur mi maktaduai nga chuang an awm a ni.
Turks inthlanah hian ram pawna awm ten vote an thlak theih avangin Germany, France leh ram danga cheng te chuan vote thlak der tawhin 1.76 million-in vote an thlak tawh a ni.
Vote thlak tihbuaina ber tur chu kumin 6 February a lirnghing na takin a nuaina hmuna chengte niin mi tam takin an chenna an chhuahsan lo thei lova, mahse, an vote neihna chhinchhiahna hmunah lo chuan vote an thlak thei bawk si lo a ni.
Lirnghing avang leh a hnua sorkarin chhawmdawlna a kalpui danah mi tam tak an lungawi lo bawk a. Heng voters te hi political party-te chuan hmun hrang hrang atangin an hruaikhawm bawk a ni.
Vote tihchingpen emaw a awm loh nan opposition party te chuan ballot box 192,000 te chu a him a ni tih finfiah nan an veng hial bawk.
Erdogan chuan Inrinni khan campaign tawpna chu Istanbul a Hagia Sophia-ah a hmang a, Hagia Sophia hi Orthodox Christian cathedral ni thin ni mah se, Ottoman hun laiin mosque ah leh a ni a. Mahse, a hnuah Turkey modern-day secular founder Ataturk chuan museum ah letin hei hi President Erdogan chuan kum 2020 khan mosque-ah a let leh a ni.
Turks ten Erdogan paithla thei dawn em?
