Tyler, the Creator ‘CHROMAKOPIA’ a la No.1

Tyler, the Creator ‘CHROMAKOPIA’ a la No.1
Tyler, the Creator album thar ‘CHROMAKOPIA’ chu Billboars 200 (albums) chart-ah a No.1 a, he chart-a a zawna kar hnih a No.1-na niin, Tyler-a album he chart-a kar hnih a zawna No.1 thei hmasa ber niin, a album kar khat aia tam No.1 thei pahnihna a ni bawk. Hetihrual hian Lil Uzi Vert leh The Cure te pawh chart top 5-ah an debut.
Billboard 200 (albums) chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming leh album-a hla mal hralhna atanga album hralhna tlukpui te belhkhawm thin a ni.
‘CHROMAKOPIA’ hi kar khat chhungin US-ah 1,60,000 an hralh leh a, chung zinga 1,15,000 chu streaming atanga album tlukpui (on-demand official stream maktaduai 160.31) tlingin, album tak tak hralh chu 44,500 a tling a, album-a hla mal hralhna erawh chhiar tham a ni lo.
Chart No.1 hlui Sabrina Carpenter ‘Short n’ Sweet’ chu 68,000 hralh lehin No.3 atangin No.2 a kai thar ve leh ta bawk.
Lil Uzi Vert album thar ‘Eternal Atake 2’ chu 59,000 hralhin No.3-ah a debut a, chung zingah 56,000 chu streaming (on-demand official stream maktaduai 76.43) atanga album tlukpui niin, album tak tak hralh chu 3,000 a ni a, hla mal hralhna chu chhiar tham a ni lo. Lil Uzi Vert hian he chart top 10 a lang thei album panga a nei tling ta a ni.
The Cure pawhin tun kum 30 chhunga he chart a an tawn san ber tum thlengin, an album thar ‘Songs of a Lost World’ chu 57,000 hralhin No.4-ah a debut a, chung zinga 53,000 chu album tak tak hralhna niin, streaming atangin 4,000 (on-demand official stream maktaduai 5.02) a tling a, hla mal hralhna chu chhiar tham a ni lo. The Cure hian tun kum 20 chhunga chart top 10 a lang thei album an neih leh hmasak ber a ni a, 2008 hnua an album tlangzarh leh hmasak ber a ni bawk.
Gracie Abrams ‘The Secret of Us’ chu 50,000 hralh lehin No.7 atangin No.5-ah a insawn a, Chappell Roan ‘The Rise and Fall of Midwest Princess’ chu 46,000 hralh lehin No.12 atangin No.6 a kai thar leh a, Billie Eilish ‘Hit Me Hard and Soft’ chu 44,000 aia tam deuh hralh lehin No.9 atangin No.7 a insawn leh a, Rod Wave ‘Last Lap’ chu 44,000 hralh lehin No.5 atangin No.8-ah a tawlh a, chart No.1 hlui Taylor Swift ‘The Tortured Poets Department’ chu 43,000 hralh lehin No.11 atangin No.9 a kai thar leh a, chart No.1 hlui bawk Morgan Wallen ‘One Thing at a Time’ chu 43,000 tling lo deuh hralh lehin No.8 atangin No.10-ah a tawlh ta bawk.