Typhoon Yagi avangin mi 64 thi

Thawhtanni (September 9, 2024) a lei chim hnuah tuilianin bus hnawlin typhoon tleh avanga leimin, power awm lo te leh harsatna hrang hrang avanga southeast Asian rama nunna chan chuan mi 64 tling tawhin sumdawnna leh factory tam tak te chu kalpui theih loha siamin a awm mek bawk.
“Sptember 8-a Typhoon Yagi in Vietnam a landfall a neih hnuah mi pakuain nunna chan phah zuiin a kaihhnawiha leimin leh tuilian avangin mi 50 chuangin nunna an chan phah bawk” tiin state media VN Express chuan a tarlang a. Northern Vietnam a lui tui tam tak te chu hlauhawm chhinchhiahna chungah an la luang vek bawk.
Passenger 20 phur bus chu Cao Bang province ah tuilianin a len bawk a, chhanchhuahna kalpui tur pawhin leimin in kawngpui a danchah tlat avangin chak taka kalpui theih a ni hek lo.
Kum 50-a upa Pham Truong chuan a mototrcycle-a lei a zawh mek laiin thil ri ring tak a hriat thu a sawi a. Thil awm dan a hriatfiah thiam tak tak hmain a hnuaia luiah a tla thla hman der tiin a sawi a. “Lui chhiat ka thleng hman hialin ka hria” tia sawiin Son chuan vanneihthlak takin balhla kung tuiin a len chu manfuhin engtin tin emaw vaukam lamah a hleuhkai thei hlauh tiin a sawi.
“Haipong province ah chuan tuilian leh leimin nasa avangin sumdawnna te kalui hleihtheihlohin a awm” tiin Lao Dong newspaper chuan a tarlang bawk a. Typhoon in factory tam tak chung a lak avang leh industrial unit tam tak chu tuilianin a chim vangin bungrua leh thil siamchhuah tawh te tihchhiat a nei ngah hle bawk a. Company tam takin electricity la nei thei lovin production a pangngaia a kal leh theih nan chuan thla khat tal a ngai dawn an ti bawk.
Electric ban te a tluk nasat avangin Haiphong leh Quang Nih province te chuan power an la nei thei lo va. Heng province pahnihte hi Vietnam-ah pawh industrial hub niin ram danga thawnchhuah bungrua hrang hrang siamna niin chung zingah chuan EV maker VinFast leh Apple supplier Pegatrong leh USI te pawh an tel a ni. Thuneitute chuan khuarel chhiatna in a khawih pawi te enfiahna nei mekin enterprise 100 chuang in an tuar nasa hle a, bungrua an chan hlutna chu dollar million tel a ni tia sawi a ni bawk.
Prime Minister Pham Minh Chinh chuan Haiphong city tlawh zui nghalin port city chhawmdawl nan $4.6 million a thehchhuak nghal bawk a.
Typhoon Yagi kha kum sawm chang fe chhunga Vietnam nuaitu typhoon hlauhawm ber niin thli 149 kmph a chak a keng tel a. Thli mai ni lo ruah nasa tak a ken tel chuan tuilian leh leimin a siam nasa hle bawk.
Typhoon Yagi khan Vietnam a nuai hma in Philippines nuai hmasa in mi 20-in nunna an chan phah a, a hmain southern China a nuainaah mi paliin nunna an chanphah bawk.
Chinese thuneitute chuan Typhoon Yagi in Hainan island province a nuai avanga tihchhiat a neih hlut zawng chu $102 million tia sawiin chenna in 57,000 chuang a tichhe bawk a, power leh water outage siamin thingkung tam tak titlu in kawngpui a tichhe nasa hle bawk a. Chu chuan harsatna a thlen nasa zual a ni.