UAE-ah Indian thi, indonaah Indian pasarih thi ta

UAE-ah Indian thi, indonaah Indian pasarih thi ta
United Arab Emirates (UAE)-a Abu Dhabi-ah missile kah thlak puak darhin a fuh avanga mi pahnih thi zingah Indian pakhat a tel a, Asia khawthlanga buaina chhuak avanga Indian thi chu mi pasarih an tling ta.
Abu Dhabi-ah vek hian Sweihan Street-ah air defence system-in ballistic missile a lo kah thlak darh tlain mi a fuh avanga hliam pathum zingah Indian a tel bawk niin UAE thuneituten an sawi.
Abu Dhabi-a India embassy chuan social media-ah thuchhuah siamin Indian thi an awm thu hi a puang a, “Embassy of India chuan Ningania Abu Dhabi-a thil puak keh themin a fuh avangin Indian pakhat thihna a thleng a, kan tawrhpui tak zet a ni,” a ti.
He thil thlengah hian Indian bakah Pakistani pakhat a thi bawk a. Abu Dhabi Media Office chuan Emirati mi pakhat, Jordan mi pakhat leh India mi pakhatin hliam an tuar a, an hliam hi na vak lo leh na tak thlengin an ni hlawm tih an sawi.
February 28-a Israel leh US tangdunin Iran an beih atanga Asia khawthlanga buaina a chhuah hnua UAE-a India thi hmasa ber a ni.
Indian embassy chuan UAE thuneitute nen thawhhona tha tak an neih thu sawiin theihtawp chhuaha tanpuina pek tura hma lak zel a ni tih an sawi.
March 18 khan missile leh drone hmangin Saudi Arabia khawpui, Riyadh beihnaah Indian pakhat a thi a, March 13 khan Oman-a industrial area beihnaah Indian pahnih an thi bawk a. Indona chhuah tirh lama sumdawng lawngte beihnaah tuipuia thawk Indian pathum an lo thi bawk a. Heng mite bakah hian India khua leh tui pakhat chin hriat lohvin a awm mek bawk.
Arab ram eng emaw zata pawikhawihna thlengah Indian tam takin hliam an tuar tawh a, heng zingah hian Saudi Arabia, United Arab Emirates (UAE), Oman leh Iraq te pawh a tel.
Indian sorkarin tun hnaia heng ram hruaitute a biaknaah Asia khawthlang lam ram hrang hranga cheng Indian maktaduai 10-te himna chu a ngaih pawimawh ber a ni zel a. Saudi Arabia leh UAE-ah ringawt pawh maktaduai riat vel an cheng a ni.