Barcelona leh Spain midfielder Andres Iniesta chuan Japan club Vissel Kobe tana kum nga a khelh hnuah Gufl ram lam hawi zui lehin, United Arab Emirates Pro League club Emirates Club nen inremna an ziak fel.
Tarlan tak angin, Spaniard hian J-League season laihawl July ni 1 khan a khelh mekna Japanese club Kobe a chhuahsan deuh thut a; a chhuah thleng khan kum 39 mi ni tawh hian Japanese club tan game 134 khel tlingin, kum 2019 khan domestic Emperor’s Cup-ah a champion-pui a; a kumlehah Japanese Super Cup title a lakpui bawk.
Iniesta hian Japan a pan hma khan kum 22 chhung zet a khawsakna Barcelona tan senior match 674 khel tlingin, trophy pawh 32 ngawt a hawnsak tling.
Spain tan pawh game 133 khel tlingin, an ram chu 2010 World Cup-a a champion-pui bakah kum 2008 leh 2012 khan European Championship trophy a lakpui bawk.
Season liamta maia UAE top flight-a kai chho Emirates Club chuan social media kaltlangin Iniesta lawmna thu an tarchhuak.
A club thar hian August ni 19 khian league an tanna inkhelah Al-Wasl an tum dawn a, tah hian inlan hman tura beisei a ni.
UAE club nena contract ziak fel Iniesta
