UCL-ah United an tlawm

Nilai zan khan UEFA Champions League khelh chhunzawm a ni a, inkhel hmuhnawm takah Manchester United chu FC Copenhagen lakah an chak lova, Group table mawngphahah an awm.
Season thara chetha tluang hleithei lo, chetsual khut hrat United hian an lenluhna mual Parken, Copenhagen-ah bul an tan tha viau a, minute 28 chhungin goal hnih an thun nghal der. Mimualah chak ngei tura ngaih an nih laiin Marcus Rashford hnawhchhuah a nih vangin an talbuai a, goal li ngawt chhuahin tlawm zawkah an tang. FC Copenhagen lakah an tlawm vangin table mawngphahah an awm a ngaih phah a, last 16 lut turin fiahna hautak an hmachhawn zui a ngai dawn.
Parken-ah inkhel an tan fel deuh chauh tihin Denmark tlangval Rasmus Højlund chuan minute thumna lekah McTominay siam tha tak mai chu chiang zetin a pet goal a, hmahruaina goal a thun nghal. Hma takah goal an thun vangin Erik ten Hag-a team te an phur zui viau a, an khingpuite an nawr zui viau bawk. Red Devils hian minute 28-naah fuh zetin an nawr tlang leh a. A hun leh hmun dika awm Rasmus Højlund chuan FC Copenhagen si nghak dan per chu awlsam takin a pet goal a, an goal hnihna thunin, an hmahruaina a tizau.
Si hnih faia hmahruai tawh United hian awmze neiin game an khel a, Danish club in an nawr tlang hleithei meuh lo. Mualneitu hian chawlhlawk dawn hnaihah an mikhualte an nawr tawm a, box bulah ball an inpe kual. Minute 42-naah United forward Marcus Rashford chuan tul lo zetin Elias Jelert a rap lui. Rashford-a chet dan hi referee Donatas Rumsas-a’n hmu mai lo mah se VAR rawn turin nawr luih a ni a, VAR a rawn hnuin Rashford hi a hnawtchhuak. An mualah tam zawk an nih hnuin FC Copenhagen an phur thar a, an khel tha zui nghal viau. Tam zawk an nih hnu hian na takin an mikhual an nawr tlang a, minute 45-naah Mohammed Elyounoussi chuan hnaite atangin lei hrulah a pet goal a, an si phurh a sut then. United in an goal hmasa an chhuah danah singhak Andre Onana a che fuh tawk lo tiin a puh theih.
An si phurh an sut then hnu lawkah Denmark club an vannei zui leh a, Harry Maguire handball vangin penalty an chawi. VAR rawn a nih hnua penalty an hmuh hi Diogo Gonçalves chuan harsatna tawk lovin a pet goal a, an si phurh a sut zo. Diogo Gonçalves goal thun hnu hian goal dang a luh belh tawh lova, 2-2 a inhnehtawk chungin chawlhlawk an hmang.
Chawlhlawk hnu lamah tlem zawk ni chunga inlan Manchester United in bul an tan tha a, goal thun hmasa zawkah an tang zui leh. Minute 69-naah hand ball a awm ngeia ngaih a nih vangin VAR rawn a ni a. VAR rawn a nih hnuin Lukas Lerager chuan hand ball vangin penalty a chawi. He penalty hi United captain Bruno Fernandes chuan chiang zetin a pet goal a, hma an hruai nawn lehna goal a thun. Fernandes goal thun hi an chakpui thei tawh ngei turah ngaiin United an phur hle a, an goal venhim tumin tan an khawh zui nasa viau bawk. An hmahruaina humhim tum viau mah se an hlawhtling zo lova, hun tawp dawn hnaiah goal hnih an chhuah zui leh.
An mualah point hmuh ngei tuma inlan FC Copenhagen tan hian second half tir lama penalty chawi Lukas Lerager chuan minute 83-naah goal thunin an si phurh a sut. An si phurh an sut hnuin an phur thar hluai a, hun tawp dawn hnaihah goal an chhuah vangin United an hnual ve thung. Phur taka inlan FC Copenhagen tan kum 17 mi Roony Bardghji chuan hnaite atangin near post-ah awlsam takin a pet goal a, hma an hruai letna goal a thun. Bench atanga lut Roony Bardghji goal thun hi an chakpui a, an mualah hnehna lian changin, point thum hlu tak an hmu zui ta a ni.
Team lian United lakah hnehna an chan nawlh vangin FC Copenhagen hian khelh li atangin point li an hmu a, pahnihnaah an inhlangkai. Denmark club in hma lam an pan laiin United erawh chuan khelh thum atangin point thum chauh an la hmu a, Group A mawngphahah an tlahniam ve thung. Premier League leh inelna dangah pawh beisei phak lo United hian hma an sawn tak tak thei lova, Champions League last 16 lut zo lova an tla a nih chuan manager Erik ten Hag ban a nih tawh ngei a rinawm.
Group A-ah hian vawi li chak zawn tawh Bayern Munich in point 12 hmuin hma an hruai fal a. German champion Bayern hian last 16 an lut der tawh. Bayern Munich in last 16 an luh tawh lai hian team dang pathum; FC Copenhagen, Galatasaray leh Manchester United te erawh chu tling thei vek an ni a, tla thei vek an la ni bawk. Khelh hnih khelh hmabak an la neiha an chet phungin an hma lam hun tur a hril thui thei viau dawn. United hi an khelh leh hmasak berah an la chakna ngai loh Rams Park-ah lenglutin Galatasaray an hmachhawn ang.