February 18, Thawhleh zan khan UEFA Champions League last 16 play-off second leg khelh a ni a. Europa League champion Atalanta chu an mikhual Club Brugge hneh lovin an tlawm a, last 16 lut zo lovin an tla. Atalanta an tlak lai hian Portuggues club lian Benfica an tlang ve thung.
Italian club Atalanta hian first leg-ah mak tak maiin Club Brugge an ngam lo a, Mimualah 2-1 in tlawm zawkah an tang. An mualah Second leg khelh a nih vangin chak theih beiseina sang tak an nei naa Europa League champion team hi Mimuala an tlawna aia nasain an mualah an tlawm leh tlat thung.
Belgian club lian Club Brugge hian an lenluhna Gewiss Stadium-ah an khel tha viau a. Chawlhlawk hmain goal thum ngawt an thun hman. Mikhual team tan hian Chemsdine Talbi chuan inkhel tan atanga minute thumna lekah hmahruaina goal a thun nghal. Hma takah goal an thun vangin inrintawkna sang zawk nen an inlan a, last 16 an hnaih leh zual sawt bawk.
Atalanta hian an mualah chak mamawh viau mah se an mikhualte an nawr tlang hleithei meuh lova, goal an chhuah belh leh ta zawk. Club Brugge tan goal hmahruai thuntu Chemsdine Talbi chuan minute 27-naah an goal hnihna a thun belh zui leh zat. Si hnih faia hmahruai tawh Club Brugge tan hian Ferran Jutglà chuan chawlhlawk dawn hnaih minute 45’+3-ah an goal thumna a thun belh zui ve leh cheu a, 3-0 a hmahruai chungin chawlhlawk an hmang.
Chawlhlawk hnu lamah Atalanta an khel tha hret. Second half tan atanga minute khat hnu lekah Ademola Lookman chuan goal thunin an si phurh a sut then. Goal tam zawk thun tumin an mikhualte an nawr zui chiam naa an hlawhtling zo tawh lo. Goal thun tuma thapui an chhuah laiin an player Rafael Tolói chu minute 87-naah hnawhchhuah a ni leh zel bawk nen goal dang an thun belh thei tawh lova, Club Brugge lakah an tlawm nawn leh ta a ni. Atalanta mualah hnehna an chan leh tak vangin Club Brugge hian si belhkhawmah 5-2 ngawtin hnehna an chang a, last 16 an inhlangkai.
Thawhleh zana inkhel dangah Benfica leh an mikhual AS Monaco te chu 3-3 in an inhnehtawk a. First leg-ah si khat faia hnehna chang tawh Benfica in last 16 an lut.
French club lian AS Monaco laka hnehna chang tawh Benfica tan hian Kerem Aktürkoglu chuan minute 22-naah hmahruaina goal a thun. Goal chhuah hmasa zawk ni bawk mah se Monaco an khel tha zui viau a, tum hnih ngawt chu hmahruaitu zawkah an tang hial nghe nghe. Monaco tan hian Takumi Minamino chuan minute 32-naah goal thunin an si phurh a sut.
Chawlhlawk hnu lamah Monaco in goal an thun hmasa a, -Eliesse Ben Seghir leh George Ilenikhena te goal thun hmangin chak theihna hun tha an nei hman. Mualneitu Benfica tan Vangelis Pavlidis leh Orkun Kökçü ten goal an thun leh si vangin an inhneh tawk a, Monaco an tla zui ta a ni.
UCL atangin Atalanta an tla fel
